काठमाडौं । विगत केही समयदेखि आन्तरिक कलहमा फसेको नेपाल कम्युनिष्ट पार्टीमा आइसब्रेकको सम्भावना बढेको बुझिएको छ । अहिलेको आन्तरिक विवादलाई तत्कालका लागि पूर्ण विराम दिनेगरी नेकपाका दुई अध्यक्ष केपी ओली र पुष्पकमल दाहाल प्रचण्डबीच गएराति केही सहमति भएको बुझिएको छ ।
हिजो राति भएको सो सहमतिबमोजिम नै आज प्रचण्डलाई भेट्न प्रधानमन्त्री एवं पार्टी अध्यक्ष ओली प्रचण्ड निवास खुमलटार जादै छन् । अहिले केही बेरमा उनी खुमलटार जान लागेका हुन् । बालुवाटर स्रोतले ओलीको खुमलटार जाने कार्यक्रमलाई गोप्य राखेको भएपनि आज बिहानदेखि भने त्यसको तयारी भएको थियो ।
आज नै उनीहरु दुई जनाकाबीचमा पार्टीमा देखिएको विवादका बारेमा सहमति हुने भएको हो । दुई दिनअघि ओलीले एकतर्फी रुपमा अध्यादेश ल्याएपछि विभाजनको डिलमा पुगेको नेकपालाई बचाउन भएका प्रयासस्वरुप पार्टी सहमतिको यो चरणसम्म पुगेको बताइन्छ ।
हिजोमात्र दाहाल नेपाल पक्षले पार्टी जनगबर्गीय संगठनहरुको कार्यालय पेरिस डाँडामै आफू पक्षीय नेता कार्यकर्ताहरुको भेला गरेपछि आत्तिएका ओली अन्ततः सहमतिको लागि तयार भएको खुमलटार स्रोतले जनाएको छ ।
तर यस यिवषयमा पार्टीका वरिष्ठ नेता माधव नेपालको भने कुनै प्रतिक्रिया आएको छैन । सो भेटमा माधव नेपाल भने सहभागी नहुने स्रोतले बताएको छ ।
