काठमाडौं । विभिन्न आकर्षक प्रलोभन देखाएर बीमा कम्पनीले कोरोना संक्रमण बीमा गरे पनि त्यसको भुक्तानी सर्वसाधारण जनताले मात्र होइन जनप्रतिनिधिले समेत रकम पाउन सकेका छैनन् । काठमाडौं महानगरपालिकाका प्रमुख विद्यासुन्दर शाक्यसहित १ सयभन्दा बढी जनप्रतिनिधिले कोरोना संक्रमण भएपछि बीमा दाबी गरेर निवेदन दिएको दुई महिना बित्दासमेत रकम पाउन नसकेको गुनासो गरेका छन् । दुई महिनाअघि नै काठमाडौं महानगरपालिका प्रमुख तथा कर्मचारीहरुले भुक्तानीका लागि निवेदन दिएको भए पनि अहिलेसम्म रकम पाउन नसकेको गुनासो उनीहरुले गरेका छन् ।
महानगरपालिकाका प्रवक्ता ईश्वरमान डंगोलका अनुसार जनप्रतिनिधि र कर्मचारी गरी १ सयभन्दा बढीको बीमा रकम दाबी गरेर बीमा कम्पनीमा बुझाएको भए पनि विभिन्न बहाना बनाएर अहिलेसम्म ४० जनाको मात्रै रकम भुक्तानी गरेको र अन्यको रकम पाउन सकेका छैनन् । महानगरपालिकाले महानगरप्रमुखसहित जनप्रतिनिधि तथा कर्मचारी गरी १ हजार ९ सय ८२ जनाको एकमुष्ट कोरोना संक्रमण बीमा गरेको थियो । कोरोना बीमा गरेकामध्ये १ सयभन्दा बढीलाई कोरोना संक्रमण भएको थियो ।
कोरोना संक्रमण नियन्त्रण तथा जनताको सेवामा लाग्नुपर्ने जनप्रतिनिधि तथा कर्मचारीको मनोबल बढाउनका लागि महानगरपालिकाले संयुक्तरुपमा कोरोना संक्रमण बीमा गरेको भए पनि बीमा रकम पाउन भने अहिले झन्झट बेहोर्नुपरेको कोरोना संक्रमित कर्मचारीहरु बताउँछन् । महानगरले आगामी जेठ २२ गतेसम्म लागू हुने गरेर बीमित व्यक्तिमा पहिलोपटक कोरोना संक्रमण पोजेटिभ भए महानगरपालिकाको सिफारिसमा १ लाख रुपियाँ प्राप्त हुने व्यवस्था गरिएको प्रवक्ता डंगोलले जानकारी दिनुभयो । नेपाल समाचारपत्र दैनिक
