एजेन्सी । बलिउड अभिनेत्री जान्हवी कपूर खानामा विषाक्तता (फूड पोइजनिङ)का कारण मुम्बईको एक अस्पतालमा भर्ना भएकी छिन् । यसको पुष्टि उनका बुबा बोनी कपुरले गरेका छन् ।
एनडीटीभीसँग कुरा गर्दै बोनीले जान्हवीको अवस्था अहिले राम्रो भएको र एक–दुई दिनमा निको हुने बताए । त्यसपछि मात्रै उनलाई अस्पतालबाट डिस्चार्ज गरिनेछ ।
जान्हवीको स्वास्थ्य विगत केही दिनदेखि ठिक नभएपछि उनलाई बिहीबार अस्पताल भर्ना गरिएको थियो ।
पछिल्ला केही साता जान्हवीका लागि निकै व्यस्त सावित भएको थियो । उनले मुम्बईमा अनन्त अम्बानी र राधिका मर्चेन्टको विवाहको सबै समारोहमा भाग लिएकी थिइन् । यी समारोहमा जान्हवीको लुक्सको निकै तारिफ भएको थियो ।
जान्हवीको आगामी फिल्म उल्झ हो । यो फिल्म अगस्ट २ मा रिलिज हुँदैछ । जान्हवी यस फिल्ममा आईएफएस अफिसरको भूमिकामा देखिनेछिन् । चलचित्रका निर्देशक राष्ट्रिय अवार्ड विजेता सुधांशु सारिया हुन् । चलचित्रलाई जंगली पिक्चर्सले निर्माण गरेको हो ।
