![](https://newspolar.com/wp-content/uploads/2024/07/451594340_7959299614107962_5814867285902007627_n.jpg)
विराटनगर । सञ्चारकर्मी सञ्चिता धमलालाई कुटपिट गरेको आरोपमा प्रहरीले ५ जनालाई पक्राउ गरेको छ । बुधवार उपचार गराउन बिपी कोइराला स्वास्थ्य विज्ञान प्रतिष्ठान पुगेकी धमलामाथि आक्रमण गर्ने ५ जनालाई प्रहरीले पक्राउ गरेको हो ।
धमलाले सामाजिक सञ्जाल फेसबुकमार्फत धरानका मेयर हर्क साम्पाङका समर्थकहरूले आफुमाथि कुटपिट गरेका बताएकी छिन् । उनले भनेकी छन् ‘म बिरामी अवस्थामा बिपी कोइराला स्वास्थ्य विज्ञान प्रतिष्ठानको एक्स–रे कोठामा पालोमा थिएँ, हर्क साम्पाङका महिला समर्थकहरूले ‘धमलालाई कुट्न आको भन्दै’ म र मेरो साथीलाई पछाडिबाट आक्रमण गरी, लुगा तान्दै, कुटपिट गर्दै, लछारपछार गरेका थिए । म बिरामी अवस्थामा उपचारको लागि पुगेको थिएँ । यस्तो अवस्थामा हिंसात्मक आक्रमणको सामना गर्नु, त्यो पनि सार्वजनिक स्थानमा, कुनै पनि व्यक्तिको लागि सहन गर्न गाह्रो नै हुन्छ । अस्पताल भनेको उपचारको लागि, शान्तिको लागि र सुरक्षित ठाउँ हो । तर, यहाँ उल्टै असुरक्षित महसुस गरायो ।’
महिलाहरू पक्राउ परेपछि मेयर साम्पाङले उनीहरुलाईलाई विना सर्त रिहा गर भनेर लेखेका छन् । उनले लेखेका छन्, ‘सुनसरी प्रहरी, निर्दोष दिदीबैनीलाई बिना शर्त रिहा गर् !’
केही दिनअघि सार्वजनिक सुनुवाइका क्रममा सञ्चारकर्मी धमलाले धरानका जनप्रतिनिधिहरुले घुस खाने गरेको भन्दै प्रश्न गरेकी थिइन् । सोहि बिषयलाई लिएर मेयर साम्पाङ र धमला बीचमा विवाद हुँदै आएको थियो ।