![](https://newspolar.com/wp-content/uploads/2024/07/AP24197057259056-scaled.jpg)
काठमाडौं । कोपा अमेरिका २०२४ फुटबल प्रतियोगिताको उपाधि अर्जेन्टिनाले जितेको छ ।
अमेरिकाको मायमीमा भएको भर्खरै सम्पन्न फाइनल खेलमा कोलम्बियालाई १-० गोलले हराउँदै अर्जेन्टिनाले कीर्तिमानी १६ औं उपाधि जितेको हो ।
यसअघि उरुग्वे र अर्जेन्टिनाले समान १५-१५ उपाधि जितेका थिए । अर्जेन्टिनाको जितमा लौटारो मार्टिनेजले निर्णायक गोल गरे ।
खेलको पहिलो मिनेटमा नै अर्जेन्टिनाले गोल गर्ने मुभ बनायो । तर युलिएन अल्भारेजले बललाई सहि दिशा दिन सकेनन् ।
खेलको ५ औं मिनेटमा कोलम्बियाका लुइज डियाजले प्रहार गरेको बललाई अर्जेन्टिनाका गोलकिपर इमिलियानो मार्टिनेजले सजिलै बचाउ गरे ।
१३ औं मिनेटमा कोलम्बियाका कप्तान हामेस रोड्रिग्वेजले कर्नरबाट प्रहार गरेको बललाई कोलम्बियाका खेलाडीले गोल गर्ने प्रयास गरेका थिए, तर गोलकिपर मार्टिनेजले सजिलै नियन्त्रणमा लिए ।
२० औं मिनेटमा अर्जेन्टिनाका कप्तान लियोनल मेसीले प्रहार गरेको बल आफ्नै टोलिका अन्भारेजलाई लागेर बाहिर गयो ।
४४ औं मिनेटमा लियोनल मेसीले फ्रीकिकबाट प्रहार गरेको बललाई टालियोफिगोले हेडरमार्फत गोल गर्ने प्रयास गरेपनि उनको प्रहार पोस्टमाथीबाट बाहिरीयो ।
४८ औ मिनेटमा कोलम्बियाका जोन आरियासले प्रहार गरेको बल पोस्टको दाहिनेतर्फबाट बाहिरियो ।
५८ औं मिनेटमा अर्जेन्टिनाका डि मारियाले प्रहार गरेको बललाई कोलम्बियाका गोलकिपर कामिलो भार्गासले उत्कृष्ट बचाउ गरे ।
७६ औं मिनेटमा अर्जेन्टिनाले गोल गरेपनि गोलले मान्यता पाएन । अर्जेन्टिनाका खेलाडी अफसाइड पोजिसनमा रहे ।
निर्धारित ९० मिनेटसम्म दुबै टोलिबाट गोल हुन नसक्दा खेल अतिरिक्त समयमा धकेलियो ।
खेलको ११२ औं मिनेटमा लौटारो मार्टिनेजले उत्कृष्ट गोल गर्दै अर्जेन्टिनालाई उपाधि दिलाए ।