![](https://newspolar.com/wp-content/uploads/2024/07/FB_IMG_1721000160568.jpg)
काठमाडौं । युरो कप २०२४ फुटबल प्रतियोगिताको उपाधि स्पेनले जितेको छ ।
भर्खरै सम्पन्न फाइनल खेलमा ईंग्ल्याण्डलाई २-१ गोलले हराउँदै स्पेन च्याम्पियन बनेको हो । स्पेनको यो कीर्तिमानी चौथो उपाधि हो । अर्कोतर्फ गत संस्करणमा पनि उपविजेता रहेको ईंग्ल्याण्ड यसपटक पनि उपविजेतामै सिमित रह्यो ।
खेलको ४५ औं मिनेटमा ईंग्ल्याण्डका फिल फोडेनले प्रहार गरेको बललाई स्पेनका गोलकिपर युनाइ सिमोनले सजिलै बचाउ गरे ।
स्पेनले खेलको ४७ औं मिनेटमा निको विलियम्सको गोलबाट सुरुवाती अग्रता बनायो । लामिने यामलको पासमा उनले वान टचमा सुन्दर गोल गरे । ईंग्ल्याण्डका गोलकिपर जोर्डन पिकफोर्डले बल छेक्ने कुनै अवसर नै पाएनन् ।
त्यसको एक मिनेट पछि नै स्पेनका ड्यानी ओल्मोले गोल गर्ने अवसर खेर फाले । उनको प्रहार थोरै बाहिर गयो ।
५६ औं मिनेटमा विलियम्सले डिबक्स बाहिरबाट प्रहार गरेको बल केही बाहिर गयो ।
६४ औं मिनेटमा ईंग्ल्याण्डका जुड बेलिङहमको सशक्त प्रहारले गोल पोस्टको दिशा लिन सकेन ।
६६ औं मिनेटमा यामलको प्रहारलाई ईंग्ल्याण्डका गोलकिपर पिकफोर्डले उत्कृष्ट बचाउ गरे ।
वैकल्पिक खेलाडी कोल पाल्मेरलेवमैदान छिरेको दुई मिनेट पछि नै खेलको ७३ औं मिनेटमा ईंग्ल्याण्डका लागि बराबरी गोल फर्काए । बेलिङहमको पासमा उनले डिबक्स बाहिरबाट उत्कृष्ट गोल गरे । स्पेनका गोलकिपर सिमोनले गोल बचाउ गर्ने कुनै अवसर नै पाएनन् ।
८२ औं मिनेटमा यामलको प्रहारलाई ईंग्ल्याण्डका गोलकिपर पिकफोर्डले उत्कृष्ट बचाउ गर्दै पुनस् बिफल पारे ।
८६ औं मिनेटमा स्पेनका लागि मिकेल ओयार्जावलले विजयी गोल गरे । कुकुरेलाको पासमा उनले वान टचमा गोल गरे ।
९० औं मिनेटमा ड्यानि ओल्मोले पोस्टमा बारको काम गरे । ईंग्ल्याण्डका खेलाडीले प्रहार गरेको बललाई हेड गर्दै उनले स्पेनका लागि गोल बचाए ।