काठमाडौं ।राष्ट्रिय स्वतन्त्र पार्टीका सभापति एवम् गृहमन्त्री रवि लामिछानेले भ्रष्टाचारका फाइल खोल्न खोजेको २४ घण्टामा नै सरकार ढालिएको दाबी गर्नुभएको छ ।
शुक्रबार बसेको प्रतिनिधि सभा बैठकमा प्रधानमन्त्री पुष्पकमल दाहाल प्रचण्डले राखेको विश्वासको मतसम्बन्धीको प्रस्तावमाथि छलफलमा भाग लिँदै लामिछानेले भ्रष्टचारका फाइल खोल्न खोजेको २४ घण्टामा नै सरकार ढालिएको दाबी गर्नुभयो ।
उहाँले भन्नुभयो “संविधान जोगाउने नाममा कसलाई जोगाउन सहमति भयो ? न देशलाई थाहा छ, न जनतालाई, न सहमतिकर्ता दलका सांसदहरूलाई नै ।”
लामिछानेले केही नियुक्ति, बेचन झा र प्रतिक थापा पक्राउ परेकै कारण वर्तमान सरकार ढलेको दाबी गर्नुभयो ।उहाँले जनतालाई पनि यही कारणले सरकार ढलेको मात्रै थाहा पाएको दाबी गर्नुभयो । उहाले कांग्रेस र एमालेले व्यापारीको घरमा गरेको सहमतिलाई राष्ट्रिय सहमति भनिएकोमा आपत्ति जनाउनु भएको छ ।
उहाँले राष्ट्रिय सहमति राति गर्ने कुरा नभएको भन्दै राष्ट्रिय सहमतिको नामले राष्ट्रियता शब्दको पनि मानमर्दन भएको दाबी गर्नुभयो ।
तस्बिर : रासस
