पोखरा । मानव अधिकारका लागि महिला, एकल महिला समूह गण्डकी प्रदेशले बुधबार पोखरामा आयोजना गरेको ‘सङ्क्रमणकालीन न्यायका लागि द्वन्द्व प्रभावित महिलाको पहुँच’ विषयक प्रदेश स्तरीय एकदिने कार्यशाला गोष्ठी सम्पन्न भएको छ ।
द्वन्द्व प्रभावित एकल महिलाले व्यवस्था बदलिए पनि अवस्थामा परिवर्तन हुन नसक्दा पीडितको आवाज बन्दकोठामा मात्रै सीमित हुने गरेको बताएका छन् । पीडा र छटपटिका स्वरले कार्यक्रम हलमा गुञ्जे पनि कार्यक्रमसँगै आवाज विलीन हुँदा न्याय पाउन नसकेको एकल महिलाले गुनासो गरेका हुन् ।
सहभागीहरुले परिवर्तित व्यवस्थाका लागि आफ्ना परिवारका सदस्यले बलिदानी गरेको स्मरण गर्दै पीडितले परिवर्तनको आभाष गर्न नसकेको बताएका हुन् । सो कार्यशाला गोष्ठीमा प्रदेशका ८ जिल्लाका ५५ जनाको सहभागिता रहेको समूहका प्रदेश सचिव मीना अधिकारीले जानकारी दिनुभयो । तस्वीर : जमुनावर्षा शर्मा/रासस
