काठमाडौँ । युरो कप फुटबल २०२४ अन्तर्गत आज शुक्रबारबाट क्वाटरफाइनलका खेलहरु हुँदैछन् ।
आज राति दुई खेलहरु हुनेछन् । पहिलो खेलमा आयोजक जर्मनीले स्पेनको सामना गर्दैछ । खेल नेपाली समयानुसार राति पौने १० बजे सुरु हुनेछ ।
दुई टोलीबीच हालसम्म २६ खेलहरु भएका छन् । जसमा जर्मनीले ९ र स्पेनले ८ खेल जितेका छन् भने ९ खेल बराबरी भएको छ । पछिल्लो पटक यी दुई टोली २०२२ को विश्वकपमा भिडेका थिए । जसमा दुबै टोलीले १–१ गोलको बराबरी खेलेका थिए ।
२००८ को युरो कप र २०१० को विश्वकपमा स्पेनले जर्मनीलाई हराउँदै पाखा लगाएको थियो । जर्मनी आज त्यस हारको बदला लिने दाउमा छ । घरेलु समर्थकको फाइदा उसले उठाउनेछ ।
यस्तै, आज राति नै फ्रान्स र पोर्चुगलले पनि प्रतिस्पर्धा गर्दैछन् । दुई टोलीबीचको खेल नेपाली समयानुसार मध्यरातमा पौने १ बजे सुरु हुनेछ । दुबै टोली आजको खेल जित्दै सेमिफाइनलको यात्रा तय गर्न चाहन्छन् ।
दुई टोलीबीच २८ खेल भएका छन् । जसमा १९ खेल फ्रान्सले जितेको छ भने ६ खेलमात्रै पोर्चुगलले जितेको छ । ३ खेल बराबरी भएका छन् ।
