काठमाडौँ । भ्रष्टाचार हुने मुलुकको सूचीमा नेपाल ११७औँ स्थानमा रहेको छ । गत वर्ष पनि नेपाल सोही स्थानमा थियो । मङ्गलबार जर्मनीमा ट्रान्सपरेन्सी इन्टरनेसनलले सार्वजनिक गरेको भ्रष्टाचार अवधारणा सूचकाङ्क (सीपीआई) अनुसार भ्रष्टाचार हुने मुलुकमा नेपाल ११७औँ स्थानमा परेको हो ।
ट्रान्सपरेन्सी इन्टरनेसनलले भ्रष्टाचार हुने १८० देशको सूची सार्वजनिक गरेको छ । ट्रान्सपरेन्सी इन्टरनेसनलले अघिल्लो र यस वर्ष नेपालको स्कोर स्थिर रहनुमा भ्रष्टाचार नियन्त्रणमा केही प्रगति हुन नसकेको रूपमा लिन सकिने विज्ञप्तिमार्फत जनाएको छ ।
डेनमार्क, फिनल्याण्ड र न्युजिल्याण्ड कूल १०० मा ८८ अङ्क प्राप्त गरी सबैभन्दा कम भ्रष्टाचार हुने मुलुकमा रहेको रिपोर्टमा उल्लेख छ । त्यस्तै दक्षिण सुडान सबैभन्दा कम ११ अङ्क पाई सबैभन्दा बढी भ्रष्टाचार हुने मुलुकमा परेको छ । ट्रान्सपरेन्सी इन्टरनेसनलले सन् १९९५ देखि हरेक वर्ष भ्रष्टाचार हुने मुलुकको सूची सार्वजनिक गरिरहे पनि नेपाललाई भने सन् २००४ देखि सूचीमा राखेको हो ।
