काठमाडौं । एक वर्षअघि ल्याइएको ६० किलो सुन तस्करी प्रकरणको दोस्रो चरणको अनुसन्धान अन्तिम चरणमा पुगेको छ । अब चाँडै पुरक प्रतिवेदन सरकारी वकिलको कार्यालयमा बुझाउने तयारी नेपाल प्रहरीको केन्द्रीय अनुसन्धान ब्यूरो (सिआईबी)ले गरेको छ ।
हङकङबाट क्याथे प्यासेफिकको विमानमार्फत् नेपाल भित्र्याइएको ६० किलो सुन गत वषको साउन २ गते बरामद गरिएको थियो । उक्त सुन राजस्व अनुसन्धान विभागको टोलीले बरामद गरेको थियो ।
स्कुटरको ‘ब्रेक सु’ भित्र लुकाएर ल्याएको अवस्थामा पक्राउ गरिएको ६० केजी सुन प्रकरणको दोस्रो चरणमा २० जनालाई पक्राउ गरी अनुसन्धान अघि बढाएको सिआइबीले जनाएको छ । यो घटनामा संलग्न रहेका भनिएका १५ जना अझै फरार छन् । सीआईसीले आफ्नो अनुसन्धानबारे सम्भवत: एक हप्ताभित्रै पत्रकार सम्मेलन गरी जानकारी दिने तयारी गरेको छ ।
दोस्रो चरणको अनुसन्धानमा सिआइबीले भारतीय नागरिक प्रशान्तगणेश वजवलकर, सिद्धनाथअशोक गायकवाड, बैजनाथमहादत्त गोयल, धीरजदिनेश वैट, पर्सा वीरगञ्ज–११ का सुरेन्द्रमान श्रेष्ठ, भक्तपुर सूर्यविनायक–५ का राजु खत्री, मध्यपुर–१५ का सुशील जाकिबन्जा, काभ्रेपलाञ्चोक तेमाल–४ का कान्छा लामा, नमोबुद्ध–१० का भीमप्रसाद तिमल्सिना, भुम्लु–१ का रुपक भण्डारी, काठमाडौँ–७ का प्रज्वल आचार्य, काठमाडौँ सुविधानगरका सुरजशमशेर जबरा, बाफलका कश्यप मानन्धर, गुल्मी सत्यवती–१ का लालबहादुर कुँवर, बारा जितपुर–१९ का अरुणकुमार यादव, तिब्बतीयन नागरिक गङ्गा टासी तथा सेराप भन्ने सोनम गुरुङलाई पक्राउ गरी थुनामा राखेको छ ।
दोस्रो चरणको अनुसन्धानका क्रममा सुन तस्करी गर्ने, गलाउने, ओसारपसार गर्ने, खरिद तथा बिक्री गर्ने तथा रकम व्यवस्थापनमा योजनाबद्ध रुपमा सङ्लग्नहरुमाथि अध्ययन गरिरहेको सीआईबीले फरार रहेका १५ जनाको पनि खोजी जारी राखेको छ ।
यसअघि सीआइबीले पहिलो चरणको अनुसन्धान पूरा गरी गत असोज १ गते २९ जनाविरुद्ध तीन अर्ब ३० करोड ३० लाख रुपैयाँ बिगो तथा जरिवानाको मागसहित अनुसन्धान प्रतिवेदन जिल्ला सरकारी वकिल कार्यालयमा बुझाएको थियो ।
