काठमाडौं । पूर्वराष्ट्रपति विद्यादेवी भण्डारीले इद उल अज्हा (बकर इद) पर्वको अबसरमा नेपाली मुस्लिम दिदीबहिनी तथा दाजुभाइहरूमा सुख, शान्ति तथा समृद्धिको लागि हार्दिक शुभकामना व्यक्त गर्नुभएको छ ।
पूर्वराष्ट्रपति भण्डारीले नेपाली समाज विविध जातजाति, भाषाभाषी र संस्कृतिहरूको सुन्दर फूलबारीको रूपमा रहेको उल्लेख गर्दे यही विविधता बिचको एकता नै हाम्रो राष्ट्रिय पहिचान र सामर्थ्य भएको जनाउनु भएको छ । उहाँँले विविध भाषा, धर्म र संस्कृति अँगालेका जनता बिचको आपसी सद्भाव, एकता, सहिष्णुता र सम्मानपूर्ण सहअस्तित्वबाट नै हाम्रो राष्ट्रिय एकता अझ सबल र सुदृढ बन्न सक्ने उल्लेख गर्नुभएको छ ।
इस्लाम धर्मावलम्बीहरूले मनाउने प्रमुख चाडहरूमध्ये एक इद उल अज्हा (बकर इद) को पावन दिन हो । यो चाडलाई मुख्यतया ध्यान, प्रार्थना र बलिदानको चाडको रूपमा लिइन्छ । यस चाडले मुस्लिम संस्कृतिमा विद्यमान परोपकार र साझेदारीको असल अभ्यासलाई समेत प्रतिबिम्बित गर्दछ ।
