काठमाडौँ । नेपाल क्रिकेट टोलीले ट्री–२० विश्वकपअन्तर्गत भोलि शनिबार बिहान आफ्नो तेस्रो खेलमा सुपर ८ मा पुगिसकेको टोली साउथ अफ्रिकासँग प्रतिस्पर्धा गर्दैछ ।
खेल नेपाली समयानुसार सवा ५ बजे सुरु हुनेछ । नेपाललाई यो खेल निकै महत्वपूर्ण रहेको छ । बलियो टोली साउथ अफ्रिकासँग भिड्दै गर्दा नेपालको लक्ष्य जित हुने कप्तान रोहित पौडेल बताउँछन् ।
‘हामी मैदानमा उत्रिएपछि हाम्रो मानसिकता नै कसरी जित्ने भन्ने हुन्छ । हाम्रो टीमको राम्रो तयारी छ । दक्षिण अफ्रिकासँग खेल्नलाई उत्साहित छौं ।’ रोहितले प्रेस मिटमा भने ।
अमेरिकाले भिसा नदिएका कारण सुरुआती दुई खेल गुमाएका लेग स्पिनर सन्दीप लामिछाने यो खेलमा उपलब्ध हुनेछन् । सन्दीपको अगामनपछि टोली बलियो बनेको रोहित बताउँछन् ।
पहिलो खेलमा नेदरल्यान्ड्ससँग ६ विकेटले पराजित भएको नेपालले वर्षाका कारण श्रीलंकाविरुद्धको खेल हुन नसकेपछि अंक बाँडेको थियो ।
नेपाललाई सुपर ८ मा स्थान बनाउने सम्भावना जिवितै राख्न यो खेल जित्नै पर्ने दवाब छ ।
तस्बिरः क्यान
