काठमाडौं । भूगोलका हिसावले नेपाल र अमेरिका ठीक विपरित ध्रुवमा छन् । तर पनि लाखौं नेपाली अमेरिकामा पुगेका छन् र त्यहाँ जीवन निर्वाह गरिरहेका छन् । भूगोल जतिसुकै टाढा भए पनि नेपालीको मन नेपालमै छ भन्ने पुष्टि विश्वकप टि–ट्वेन्टी क्रिकेट प्रतियोगिताले गरेको छ । अहिले हजारौं नेपाली नेपाली क्रिकेट टोलीको खेल हेर्न मैदानमा पुग्ने गरेका छन् ।
देशको सम्बन्ध जत्तिकै खेलकुदको सम्बन्ध पनि विश्वव्यापी छ । अमेरिकामा बसोबास गर्दै आएका नेपालीले क्रिकेटप्रति देखाएको प्रेम र मोह साह्रै अनुकरणीय छ । अध्ययन र कामको सिलसिलामा अमेरिका पुगेका नेपालीहरुले देखाएको नेपाली क्रिकेट टोलीप्रतिको सद्भाव कहिल्यै विर्सन नसकिने छ । नेपाली टोलीलाई हौसला दिन राष्ट्रिय झन्डा बोकी खेल मैदानमा पुगेका हजारौं नेपालीले देखाएको देशप्रेमको भावना हामी सबै नेपालीलाई खुसी पार्ने खालकै छ ।
टेक्ससमा भएको नेपाल र नेदरल्यान्ड्सबीचको खेल होस् वा नेपाल र श्रीलंकाबीच हुने तय भएको तर पानी परेपछि रद्द भएको खेल हेर्न फ्लोरिडास्थित रंगशालामा पुगेकाहरु नै किन नहोस् हजारौंले राष्ट्रिय झन्डा र नेपाली टोलीको जर्सी लगाएर पुगेका थिए । खेलमा हारजित हुनु एउटा पक्ष हो तर नेपालीले सात समुद्रपार पुगेर पनि नेपाली टोलीप्रति देखाएको सद्भाव कहिल्यै भुल्न नसकिने खालको छ ।
विदेशी भूमिमा पुगेर नेपाली खेलाडीले उच्च मनोबलका साथ खेल्दा खेल्दै बलियो टिम नेदरल्यान्ड्ससँग पराजित भयो तर सन् २०१४ पछि विश्वकपमा अवसर प्राप्त गरेको नेपाली टोलीको अठोट र प्रयत्नलाई हामी सबैले मुक्तकण्ठले प्रशंसा गर्नैपर्छ । नेपाली टिमले खेलको नियमानुसार हारेर पनि नेपाली जनता र विश्व समुदायको मन जितेको छ । अझ विदेशमा रहेका नेपाली नागरिकको भावना समेट्न सकेको छ ।
नेपाली क्रिकेट टोलीले अहिले अमेरिकामा रहेका सबै नेपालीलाई नेपालसँग फेरि एक पटक जोडेको छ । भावनात्मक रुपमै नेपालीबीचको सम्बन्ध थप बलियो भएको छ । यो नेपाली खेलाडीका लागि अभूतपूर्व अवसरसमेत हो । यो खेलको माध्यमबाट विश्वभर छरिएर रहेका नेपालीको भावनालाई राष्ट्रिय गान, राष्ट्रिय झन्डा र खेलमार्फत् देशप्रेमसँग जोडियो । यसैगरी नेपालको पहिचान विश्वभर फैलाएर गौरव गर्न लायक जिम्मेवारी खेलाडीहरूले पूरा गरेका छन् । विश्वसामु देशको पहिचान र गौरवपूर्ण इतिहासका लागि यो विश्वकप क्रिकेट खेल प्रतियोगिता ऐतिहासिक र महत्त्वपूर्ण कोसेढुंगा सावित हुन पुगेको छ ।
खेलकुदको माध्यमबाट हामी नेपालीमा आस्था, विचार, दलतन्त्र र विभिन्न दलीय वादभन्दा माथि उठेर अभूतपूर्व रूपले भावनात्मक एकता हुन सम्भव छ भन्ने देखाएको छ । सरकारले राजनीतिभन्दा माथि उठेर नेपाली क्रिकेट खेलको विकासका लागि पर्याप्त भौतिक पूर्वाधार व्यवस्था गर्दै खेलाडीको मनोबल उच्च राख्नुपर्छ । यसले संसारभरका नेपालीलाई एकताको सुत्रमा बाँध्न पक्कै पनि सहयोग पुग्ने छ ।
खेलकुद राष्ट्रको इज्जत, प्रतिष्ठा र गौरवसँग जोडिएको हुन्छ । खेलकुदमा मानिसहरूलाई एकताबद्ध गर्ने र समाजमा रहेका विभिन्न किसिमका भेदभावहरू तोड्ने शक्ति हुन्छ । किनभने, राष्ट्रका गहना भनिने खेलाडी सबैका साझा हुन्; उनीहरू जात, लिंग, धर्म, सम्प्रदायभन्दा माथि छन् ।
यसर्थ खेलाडीहरू राष्ट्रिय एकताका प्रतीक पनि हुन्; अनि त जब अन्तर्राष्ट्रिय प्रतियोगिता सञ्चालन हुन्छ, सारा जनता आपसी मनमुटाव बिर्सेर एक हुन्छन् र आफ्नो देशका खेलाडीलाई समर्थन गर्न पुग्छन् । यसको उदाहरण बनेको छ अमेरिकामा जारी टि–ट्न्टी विश्वकप क्रिकेट ।
नेपाल र नेदरल्यान्डबीच भएको खेल हेर्न जम्मा भएका १५ हजारभन्दा बढी नेपाली समर्थकले आईसीसीको समेत ध्यान खिचेको छ ।
अमेरिकामा बसोबास गर्ने अन्य मुलुकका नागरिक पनि नेपालीहरुको भावनात्मक एकता र देशभक्ति देखेर चकित भएका छन् । अझ नेपाल र श्रीलंकाबीच हुने भनिएको खेल हेर्न त भारी वर्षाका बीच नेपालीहरु छाता ओडेरै रंगशालामा पुगेका थिए । खेल रद्द भयो तर नेपालीको भावनात्मक एकता बढाउन सहयोग पुग्यो ।
अन्तर्राष्ट्रिय प्रतियोगितामा नेपाली टोली जहाँ पुग्छन्, त्यहाँ दर्शक पाउन कुनै समस्या छैन । क्रिकेट होस् या फुटबल नेपाली टोलीका समर्थक विश्वका जुनसुकै देशका जुनसुकै शहरमा पुग्ने गरेका छन् । यस्ता प्रतियोगितामा सहभागी भएर आपसी भाइचारा प्रकट गर्ने गर्दछन् । आपसी मनमुटाव बिर्सेर एकजुट भई आफ्नो टिमलाई समर्थन गर्न पुग्ने नेपालीहरु सबै काम बिर्सेर खेल हेर्ने समय निकाल्छन् ।
खेलकुदमा राजनीतिक, धार्मिक र सामाजिक हैसियतलाई बिर्सिएर समान भावना उत्पन्न गराउने शक्ति हुन्छ । धर्म, जात, वर्ग सबै बिर्सेर एकजुट भई साझा जोसमा केन्द्रित भई आफ्नो टोलीलाई समर्थन गर्न पुग्नु नै खेलकुदको विशेषता हो ।
