काठमाडौँ । टी–२० विश्वकप २०२४ को १५ औं खेलमा बंगलादेशले २०१४ को च्याम्पियन श्रीलंकालाई दुई विकेटले पराजित गरेको छ ।
प्रतियोगितामा श्रीलंकाको यो लगातार दोस्रो हार हो । टी–२० विश्वकपमा श्रीलंकाविरुद्ध बंगलादेशको यो पहिलो जित हो । यसअघि दुई खेल भएका थिए जसमा दुवै खेल श्रीलंकाले जितेको थियो ।
डलासको ग्रान्ड प्रेरी स्टेडियममा भएको खेलमा बंगलादेशले टस जितेर पहिले बलिङ गर्ने निर्णय गरेको थियो । श्रीलंकाले २० ओभरमा ९ विकेट गुमाएर १२४ रन बनाएर बंगलादेशलाई १२५ रनको लक्ष्य दिएको थियो । जवाफमा बंगलादेशले १९ ओभरमा ८ विकेट गुमाएर लक्ष्य पुरा गर्यो ।
बंगलादेशका लागि तोहिद ऋदोयले ४०, लिटन दासले ३६, महमुदुल्लाहले १६ रन जोडे । बलिङतर्फ श्रीलंकाका नुवान तुषाराले ४, वानिन्दु हसरंगाले २ तथा मथिसा पथिराना र धनञ्जय डी सिल्भाले १–१ विकेट लिए ।
त्यसअघि श्रीलंकाले २० ओभरमा ९ विकेट गुमाएर १२४ रन जोड्यो । उसका लागि पाथुन निसान्काले ४७, धनञ्जय डि सिल्भाले २१, चारिथ असलान्काले १९ र कुशल मेन्सिले १० रन जोडे ।
बलिङतर्फ बंगलादेशका मुस्ताफिजुर रहमान र रिसद हुसेनले ३–३, तस्किन अहमदले २ तथा तान्जिम हसन सकिबले १ विकेट लिए ।
