एजेन्सी । भारतको लखनउमा एक डाक्टरको बन्द घरमा चोर पसेका थिए । उनले पूरै घर खोजे, बहुमूल्य सामानहरू जम्मा गरे र आराम गर्न एसी अन गरे । तर, उनको आरामको रमाइलो बिहानै प्रहरीको घेरामा परेपछि बिग्रियो ।
लखनउको इन्दिरा नगरको सेक्टर २० मा बस्ने डा. सुनिल पाण्डेको घरमा यो अनौठो चोरी भएको हो । टाइम्स अफ इन्डियाका अनुसार सुनील पाण्डे हाल वाराणसीको बलरामपुर अस्पतालमा तैनाथ छन्, जसका कारण उनको घर खाली थियो ।
चोरले उनको घरको ताला तोडेर प्रवेश गरी बहुमूल्य सामानहरु जम्मा गरेका थिए ।
चोरीपछि उनी गर्मीबाट बच्न एसी अन गरेर सुते । तर, मदिराको नशामा उनी यति गहिरो निदाएका थिए कि प्रहरी आएपछि पनि उठेनन् । बिहान डाक्टर पाण्डेको ढोका खुलेकाले छिमेकीलाई शंका लाग्यो । उनले भित्र हेरेपछि घर अस्तव्यस्त थियो र सबै सामान छरपस्ट थियो । छिमेकीले तत्काल प्रहरीलाई खबर गरेका थिए ।
प्रहरी घटनास्थल पुग्दा चोर सुतेको अवस्थामा फेला परेको थियो । चोरको पहिचान कपिल रहेको र उनको साथबाट चोरीको सामान बरामद भएको छ । प्रहरीले कपिललाई पक्राउ गरेको छ र उनीविरुद्ध आईपीसीको धारा ३७९ ए अन्तर्गत चोरीको मुद्दा दर्ता गरिएको छ ।
चोरले अलमारी तोडेर नगदसहित सबै सामान चोरेको प्रहरीले जनाएको छ । उनले धुने बेसिन, ग्यास सिलिन्डर र पानीको पम्प पनि चोर्ने प्रयास गरेर घरको ब्याट्री पनि निकाल्ने प्रयास गरे तर निस्कनुअघि आराम गर्ने सोचेर एसीको हावामै सुते ।
