एजेन्सी । तीन दिनअघि ‘बिग बोस १७’ विजेता मुनवर फारुकी अस्पतालमा भर्ना भएको खबर आएको थियो । यसपछि उनले इन्स्टाग्राम स्टोरीमा फ्यानसँग आफ्नो स्वास्थ्य अपडेट सेयर गर्दै अहिले आफू ठिक भएको बताए ।
यी सबैको बीचमा अब कमेडियनको बारेमा अर्को ठूलो खबर बाहिर आएको छ, जुन सुनेपछि उनका करोडौं फ्यानलाई ठूलो झट्का लागेको छ । वास्तवमा, मुनवर फारुकीले विवाह गरेको खबर छ ।
जुमको रिपोर्ट अनुसार ‘बिग बोस १७’ विजेता मुनवर फारुकी दोस्रो पटक दुलहा बनेका छन् । उनले गोप्य रूपमा दोस्रो विवाह गरे, जसको खबर इन्डस्ट्रीमा कसैलाई पनि परेन । रिपोर्टमा मुनवरका नजिकका आफन्त र साथीहरू मात्र विवाह समारोहमा उपस्थित भएको दाबी गरिएको छ ।
मुनवर फारुकीको विवाहको खबरका बीच अभिनेत्री हिना खानको एक पोस्ट भाइरल भइरहेको छ, जसका कारण फ्यानले उनी पनि यो विवाहको हिस्सा भएको अनुमान गरिरहेका छन् । अभिनेत्रीले केही घण्टाअघि आफ्नो इन्स्टा स्टोरीमा एउटा तस्बिर सेयर गरेकी थिइन्, जसमा उनी देसी अवतारमा देखिएकी छिन् । यससँगै उनले ब्याकग्राउन्डमा ‘मेरे यार की शादी’ गीत पनि बजाइरहेकी छन् ।
जुमले आफ्नो रिपोर्टमा मुनवरले आईटीसी मराठामा विवाह गरेको र उनकी श्रीमतीको नाम मेहजबीन कोतवाला रहेको दाबी गरेको छ । जो मेकअप आर्टिस्ट हुन् । तर, मुनवरले यो खबरको पुष्टि भने गरेका छैनन् ।
