काठमाडौं । काठमाडौंको तारकेश्वर नगरपालिकामा भएको ट्राफिक प्रहरी युवराज घिमिरेको हत्यामा संलग्न रहेको आरोपमा ६ जना पक्राउ परेका छन् ।
तारकेश्वर नगरपालिका—९, मनमैजुमा भएको हत्यामा संलग्न रहेको आरोपमा प्रहरीले सचिन परियारसहितलाई पक्राउ गरेको हो । गएको शुक्रबार प्रहरी जवान घिमिरे एक निर्माणाधीन घरको भुइँमा उनी रक्ताम्मे अवस्थामा मृत फेला परेका थिए । उनी ट्राफिक प्रहरी प्रभाग दरबारमार्गमा कार्यरत थिए ।
लागूऔषध सेवनकर्ताहरुसँगको विवादमा उनी मारिएको हुनसक्ने प्रारम्भिक अनुसन्धानबाट देखिएको छ ।
उनलाई इँटा प्रहार गरेर हत्या गरिएको प्रारम्भिक अनुसन्धानबाट खुलेको छ ।
जिल्ला प्रहरी परिसर, काठमाडौंले शनिबार रातिसम्ममा २१ जना लागूऔषध प्रयोगकर्तालाई नियन्त्रणमा लिएको थियो । तर, बयान र सोधपुछपछि ६ जनाको संलग्नता खुलेको हो ।
खोटाङ घर भएका घिमिरे सामाखुशी बस्दै आएका थिए ।
