काठमाडौं । क्रिकेट सन्दीप लामिछानेको मुद्दामा आज फैसला आउने सम्भावना छ । नेपाली राष्ट्रिय क्रिकेट टोलीका पूर्वकप्तान लामिछानेको मुद्दामा उच्च अदालत पाटनमा जारी बहस आज सकिने र आजै फैसला आउन सक्ने सम्भावना रहेको हो ।
न्यायाधीशद्वय सुदर्शनदेव भट्ट र अन्जु उप्रेतीको इजलासमा परेको मुद्दा बहस नसकिएपछि हिजो हेर्दाहेर्दैमा राखिएको थियो । आज बहस सकिएपछि फैसला आउन सक्ने उच्च अदालत पाटनले जनाएको छ ।
जिल्ला अदालतको फैसलाप्रति लामिछानेले गरेको पुनरावेदन तथा जिल्ला अदालतले लामिछानेलाई कम सजाय दिएको भन्दै सरकारी वकिलको कार्यालयले उच्च अदालत पाटनमा दिएको निवेदनलाई एकैसाथ राखेर बहस भइरहेको हो ।
काठमाडौं जिल्ला अदालतले जबर्जस्ती करणीमा दोषी ठहर गर्दै आठ वर्ष कैद र तीन लाख रुपैयाँ जरिवाना तथा थप दुई लाख क्षतिपूर्तिको फैसला गरेपछि क्रिकेटर लामिछाने गत फागुन १० गने उच्च अदालत गएका थिए ।
लामिछानेको मुद्दाको सुनुवाइ सुरु भएसँगै उनको पक्षमा विभिन्न ठाउँमा जुलुस निस्कन थालेका छन् । हिजो पनि काठमाडौंका विभिन्न स्थानमा दिनभर जसो जुलुस निस्किए । सन्दीपको पक्षमा नाराबाजी गर्दै उनी निर्दोष रहेको दाबी प्रदर्शनमा सहभागीहरुले गरे ।
