एजेन्सी । इंग्ल्याण्डका फास्ट बलर जेम्स एन्डरसनले टेस्ट क्रिकेटबाट सन्यास लिने भएका छन् । जेम्स एन्डरसनले शनिबार सामाजिक सञ्जालमार्फत सन्यासको घोषणा गरेका हुन् ।
एन्डरसनले आफ्नो अन्तिम टेस्ट खेल वेस्ट इन्डिजविरुद्ध जुलाई १० मा लर्ड्समा खेल्नेछन् । उनी जुलाईमा ४२ वर्षका हुनेछन् ।
इंग्ल्याण्डका टेस्ट प्रशिक्षक ब्रेन्डन म्याकुलमसँगको कुराकानीपछि एन्डरसनले सन्यासको निर्णय लिएका हुन् । म्याकुलम हालै एन्डरसनलाई भेट्न न्युजिल्यान्डबाट इंग्ल्याण्ड पुगेका थिए ।
यस क्रममा उनले एन्डरसनलाई भने कि उनी अब भविष्यतर्फ हेरिरहेका छन् र २०२५–२६ एसेजका लागि टोली तयार गर्न चाहन्छन् । यस अवधिमा दुवैले गल्फ पनि खेलेका थिए ।
अहिले एन्डरसन काउन्टी क्रिकेट नखेली ब्रेकमा छन् । कामको बोझ व्यवस्थापनका कारण मे महिनाको
अन्त्यसम्म मात्र काउन्टी खेल खेल्न सक्ने उनले बताए ।
एन्डरसन टेस्टमा सर्वाधिक विकेट लिने तेस्रो बलर
एन्डरसनले यस वर्षको सुरुमा भारत भ्रमणमा आफ्नो ७०० टेस्ट विकेट पूरा गरेका थिए । एन्डरसनले २००३ मा लर्ड्समा जिम्बाब्वेविरुद्ध टेस्ट डेब्यू गरेका थिए । त्यसयता उनले १८७ टेस्ट खेलमा इंग्ल्याण्डको प्रतिनिधित्व गरेका छन् ।
यस अवधिमा उनले ३४८ इनिङ्समा २६.५३ को औसत र २.७९ को इकोनोमीमा ७०० विकेट लिएका छन् । टेस्ट क्रिकेटमा उनले ३२ पटक ५ विकेट र ३ पटक दश विकेट लिएका छन् । टेस्ट क्रिकेटमा सबैभन्दा बढी विकेट लिनेमा एन्डरसन श्रीलंकाका मुथैया मुरलीधरन (८००) र अष्ट्रेलियाका शेन वार्न (७०८) पछि उनी तेस्रो स्थानमा छन् ।
सन् २००२ मा सुरु भएको आफ्नो करियरमा एन्डरसनले इंग्ल्याण्डका लागि १९४ एकदिवसीय र १९ टी–२० खेलेका छन् । उनले एकदिवसीयमा २६९ विकेट र टी–२० मा १८ विकेट लिएका छन् । उनले सन् २०१५ मा अन्तिम एकदिवसीय र २००९ मा अन्तिम टी–२० खेलेका थिए ।
