काठमाडौँ । आईपीएल–२०२४ को ४७ औं खेलमा कोलकाता नाइट राइडर्सले दिल्ली क्यापिटल्सलाई ७ विकेटले पराजित गरेको छ । केकेआरले यो सिजन दोस्रो पटक डिसीलाई हराएको हो ।
यो जितसँगै कोलकाता अंक तालिकाको दोस्रो स्थानमा यथावत छ । टोलीको ९ खेलपछि १२ अंक छ । अर्कोतर्फ दिल्लीले ११ खेलमा १० अंकसहित छैटौं स्थानमा छ ।
इडेन गार्डेन रंगशालामा टस जितेर पहिले ब्याटिङ गरेको क्यापिटल्सले २० ओभरमा ९ विकेट गुमाएर १५३ रन बनाएको थियो । कोलकाताले १६.३ ओभरमा ३ विकेट गुमाएर १५४ रनको लक्ष्य पूरा गर्यो । वरुण चक्रवर्ती प्लेयर अफ द म्याच भए । उनले १६ रन दिएर तीन विकेट लिए ।
डिसीका लागि ९ नम्बरमा ब्याटिङ गरेका कुलदीप यादवले २६ बलमा अविजित ३५ रन बनाए भने कप्तान ऋषभ पन्तले २७ रनको योगदान दिए । कोलकाताका वरुण चक्रवर्तीले ३ विकेट लिए भने वैभव अरोरा र हर्षित रानाले २र२ विकेट लिए । मिचेल स्टार्क र सुनिल नारायणले एक–एक विकेट लिए ।
केकेआरका लागि फिल साल्टले ३३ बलमा ६८ रनको इनिङ खेले । उनले सिजनमा चौथो अर्धशतक प्रहार गरे । कप्तान श्रेयस अय्यरले ३३ र वेंकटेश अय्यरले अविजित २६ रनको योगदान दिए । सुनिल नारायणले १५ रन र रिंकु सिंहले ११ रन जोडे । दिल्लीका अक्षर पटेलले २ तथा लिजार्ड विलियम्सनले १ विकेट लिए ।
