ललितपुर । ललितपुरको महालक्ष्मीनगरपालिका वडा नं ९ कार्यालय लामाटारले सो वडाका ६५ देखि ७४ वर्षसम्मका एक सय जना ज्येष्ठ नागरिकलाई आध्यात्मिक जागरण कार्यक्रमअन्तर्गत धार्मिक तीर्थाटनमा लैजाने तयारी गरेको छ ।
यही वैशाख १४ र १५ गते दुईदिने धार्मिक तीर्थाटनको लागि वडाले सो वडाका उक्त उमेर समूहका जेष्ठ नागरिकको नाम संकलन गरि तीर्थाटनको तयारी गरिरहेको हो ।
वडाको आर्थिक वर्ष २०८०/८१ को बजेट, नीति तथा कार्यक्रमअनुसार विनियोजन गरिएको बजेटबाट जेष्ठ नागरिकहरुलाई धार्मिक तीर्थाटनमा सहभागी गराउनलागिएको वडा नं ९ का अध्यक्ष जयकृष्ण बोगटीले बताए ।
जेष्ठ नागरिकहरुलाई धार्मिक तीर्थाटनका लागि उनीहरुको मागबमोजिम चितवनको देवघाटधामलगायतका धार्मिकस्थलको भ्रमण गराइने वडाध्यक्ष बोगटीले बताए ।
७५ वर्षदेखि माथिका जेष्ठ नागरिकलाई भने उनीहरुको स्वास्थ्य र उमेरका कारण हिँड्डुल गर्न अलि समस्या पर्ने भएकाले यो कार्यक्रममा सहभागी नगराइने वडाध्यक्ष बोगटीले बताए ।
सो वडा कार्यालयले गत पुस १५ गते सो वडाका ७५ वर्ष नाघेका २३० जना जेष्ठ नागरिकलाई न्यानो ओढ्ने र बुढेसकालको सहारा लौरो दिएर सम्मान गरेको थियो ।
