काठमाडौँ । एसीसी प्रिमियर कपमा हङकङले नेपाललाई जितको लागि ११५ रनको झिनो लक्ष्य दिएको छ ।
ओमनको अल अमरेत क्रिकेट–१ मा टस हारेर पहिला ब्याटिङको निम्तो पाएको हङकङले १७.५ ओभरमा सबै विकेट गुमाएर ११४ रन बनायो ।
हङकङका अंशुमन रथले सर्वाधिक ३४ रन बनाए । उनले २६ बलमा ४ चौका र १ छक्का हिर्काए । जिशान अलीले १४, निजाकत खानले १२ र एहसान खानले ११ रन बनाउनु बाहेक हङकङका कुनै पनि खेलमडीले दोहोरो अंकमा रन बनाउन सकेनन् ।
नेपालका लागि अभिनाश बोहोराले ३ विकेट लिए । ललित राजवंशीले एक मेडनसहित २ विकेट लिए । दीपेन्द्रसिंह ऐरीले अन्तिम २ बलमा २ विकेट तथा करण केसीले १ विकेट लिए।
नेपालले केहिबेरमा जवाफि ब्याटिङ गर्नेछ । आजको खेल जिते नेपाल समूह विजेता पनि बन्दै सेमिफाइनल पुग्ने सम्भावना रहेको छ।
