काठमाडौं । काठमाडौंको नागढुंगादेखि धादिङको सिस्ने खोलासम्मको निर्माणाधीन सुरुङको आज ब्रेक थ्रु हुने भएको छ ।
नागढुंगा–सिस्नेखोला सुरुङ निर्माण परियोजनाले आज औपचारिक कार्यक्रमका बीच सुरुङको ब्रेक थ्रु गर्न लागिएको जनाएको छ । कार्यक्रममा प्रधानमन्त्री पुष्पकमल दाहालसमेत सहभागी हुने छन् ।
काठमाडौंको चन्द्रागिरी नगरपालिकाको बलम्बुदेखि धादिङको सिस्नेखोला जोड्ने नागढुंगा सुरूङमार्ग आयोजनाको मुख्य सुरूङको लम्बाइ २ हजार ६६७ मिटर छ । आज दुई मिटर खनेपछि छिचोलिने छ ।
आयोजनाको उद्धार अर्थात् रेस्क्यु सुरूङ गत साउनमै छिचोलिसकिएको छ ।
ब्रेक थ्रु भएलगत्तै सुरुङ सञ्चालनमा भने आउँदैन । आयोजनाको सम्पूर्ण काम सकिएपछि मात्र सवारी साधनलाई गुड्न दिइने छ । आगामी एक वर्षभित्र सबै काम सक्ने तयारी आयोजनाको छ ।
सुरूको सम्झौताअनुसार काम थालिएको ४२ महिनाभित्र अर्थात् गत वर्ष वैशाखमै यो आयोजनाको निर्माण पूरा भइसक्नुपर्ने थियो । तर कोरोना महामारी, स्थानीय विवाद तथा सुरूङ खन्ने क्रममा देखिएको प्राविधिक समस्या लगायत कारण आयोजना समयमा निर्माण हुन नसकेको आयोजनाले बताएको छ ।
सुरूङको सडक ढलान, बत्ती जडान, अक्सिजन पाइप जडान लगायतका काम बाँकी रहेको आयोजनाले जनाएको छ ।
