काठमाडौँ । इन्डियन प्रिमियर लिग (आईपीएल) २०२४ को २७ औं खेलमा आज पञ्जाब किंग्स (पीबीकेएस) र राजस्थान रोयल्स (आरआर) भिड्दैछन् ।
खेल साँझ ७ः४५ बजेदेखि पञ्जाबको मुल्लानपुरस्थित महाराजा यादवेन्द्र सिंह अन्तर्राष्ट्रिय क्रिकेट रंगशालामा हुनेछ । राजस्थानको १७ औं सिजनमा यो छैटौं खेल हुनेछ । ५ खेलमा ४ जित हात पारेको टोली ८ अंकसहित पहिलो स्थानमा छ । उसले आफ्नो अन्तिम खेलमा गुजरातसँग पराजित भएको थियो ।
अर्कोतर्फ, यो पञ्जाबको पनि छैटौं खेल हुनेछ । पञ्जाबले ५ मध्ये ३ खेलमा हार बेहोरेको छ भने २ खेल जितेको छ । टोली ४ अंकसहित आठौं स्थानमा छ ।
हेड टु हेड
आईपीएलमा पञ्जाब र राजस्थानबीच अहिलेसम्म २६ खेल खेलिएका छन् । ११ मा पञ्जाब र १५ खेलमा राजस्थानले जित निकालेको छ । यस मैदानमा दुवै टोली पहिलो पटक आमनेसामने हुँदैछन् ।
मोहालीको नयाँ मैदानमा आईपीएलको यो तेस्रो खेल मात्र हो । यसअघि यहाँ पीबीकेएसले दिल्ली क्यापिटल्स र सनराइजर्स हैदरावादको सामना गरेको थियो ।
यहाँको आईपीएल टोलीको उच्चतम स्कोर १८२ हो, जुन हैदराबादले पञ्जाब विरुद्धको अन्तिम खेलमा बनाएको थियो । यो रोमाञ्चक खेल हैदरावादले २ रनले जित्यो । यहाँ पहिले ब्याटिङ गर्ने टिम र रन पछ्याउने टिमले १–१ ले जित निकालेको छ ।
शुक्रबार मुल्लापुरमा मौसम बदली रहनेछ । खेलको दिन यहाँ धेरै तातो हुनेछ । तापमान २० देखि ३६ डिग्री सेल्सियसको बीचमा हुनेछ । पानी पर्ने सम्भावना छैन ।
