एजेन्सी । बुधवार भारतको सर्वोच्च अदालतले पतञ्जलीको विवादास्पद विज्ञापन मुद्दामा बाबा रामदेव र बालकृष्णको दोस्रो माफी पनि खारेज गरेको छ ।
न्यायमूर्ति हिमा कोहली र न्यायमूर्ति अमानतुल्लाहको इजलासले पतञ्जलीका वकिल विपिन सांघी र मुकुल रोहतगीलाई जानाजानी अदालतको आदेशको उल्लंघन गरेको भन्दै कारबाहीका लागि तयार रहन समेत भनेको छ ।
यसअघि अप्रिल २ मा सोही इजलासमा भएको सुनुवाइमा पतञ्जलीको तर्फबाट माफी मागिएको थियो । त्यस दिन पनि इजलासले पतञ्जलिलाई हप्काउदै यो माफी माग पूरा गर्नका लागि मात्रै भएको बताएको थियो । यसपछि अदालतले १० अप्रिलमा सुनुवाइको मिति तोकेको थियो ।
अप्रिल ९ मा, सुनुवाइको ठीक एक दिन अघि बाबा रामदेव र पतञ्जली आयुर्वेदका प्रबन्ध निर्देशक आचार्य बालकृष्णले नयाँ पत्र दायर गरे । जसमा पतञ्जलीले बिनाशर्त माफी मागेको र यो गल्तीप्रति पश्चाताप भएको र यस्तो दोहोरिने नहुने बताएका थिए ।
भारतीय मेडिकल एसोसिएशन (आईएमए) द्वारा १७ अगस्त, २०२२ मा दायर गरिएको याचिकाको सर्वोच्च अदालतले सुनुवाई गर्दैछ । पतञ्जलीले कोभिड खोप र एलोप्याथी विरुद्ध नकारात्मक प्रचार गरेको उल्लेख छ । यसै क्रममा आफ्नै आयुर्वेदिक औषधिले केही रोग निको हुने झुटो दाबी समेत गरेको आरोप लागेको छ ।
