एजेन्सी । लामो जीवन बाँच्ने मानिसबारेको रहस्य पेरुको एन्डिज पहाडमा लुकेको हुन सक्छ । त्यहाँ बसोबास गर्ने १२४ वर्षका वृद्धको दाबीलाई साँचो मानिने हो भने उनी विश्वकै सबैभन्दा वृद्ध व्यक्ति बन्न सक्छन् ।
सरकारी अधिकारीका अनुसार मार्सेलिनो अबाद नामका यी व्यक्तिको जन्म सन् १९०० मा भएको थियो । उनी पेरुको मध्य क्षेत्र ह्वानुकोका बासिन्दा हुन् । यदि यो दाबी सत्य साबित भयो भने, यी व्यक्ति विश्वको सबैभन्दा वृद्ध जीवित व्यक्ति मात्र नभई सबैभन्दा वृद्ध व्यक्ति पनि बन्नेछन् जसको उमेर आधिकारिक रूपमा प्रमाणित भइसकेको छ ।
गिनिज वल्र्ड रेकर्डले प्रायः आफूलाई संसारको सबैभन्दा वृद्ध व्यक्ति भएको दाबी गर्ने व्यक्तिहरूबाट आवेदनहरू प्राप्त गर्दछ । गिनिज वल्र्ड रेकर्ड्सका प्रतिनिधिले रोयटर्सलाई पठाएको विज्ञप्तिमा यस्तो दाबीलाई सत्य मान्नुअघि उनीहरूको विशेषज्ञ टोलीले सरकारी कागजात र अन्य प्रमाणहरू जाँच्ने बताए ।
यो दावी पूर्ण रूपमा सत्य हो भनेर सुनिश्चित गर्न यो अनुसन्धान गरिन्छ । गिनिज वल्र्ड रेकर्ड्सका अनुसार हाल विश्वको सबैभन्दा वृद्ध मानिस १११ वर्षका बेलायती नागरिक हुन् । यसै महिना भेनेजुएलाका ११४ वर्षीय वृद्धको निधन भएपछि उनले यो उपाधि पाएका हुन् ।
विश्वको सबैभन्दा वृद्ध महिलाको उमेर ११७ वर्ष छ भने अहिलेसम्म प्रमाणित भएको सबैभन्दा वृद्ध व्यक्ति १२२ वर्षकी थिइन् । अबादको जन्म एउटा सानो गाउँ छागलामा भएको थियो । सन् २०१९ सम्म उनी विश्वको नजरबाट टाढा रहे । त्यही वर्ष पेरुको सरकारले उनलाई फेला पारेर सरकारी परिचयपत्र र पेन्सन दिएको थियो ।
अप्रिल ५ मा, आफ्नो १२४ औं जन्मदिनमा, अबादले आफ्नो दीर्घायुको रहस्य फलफूल र भेडाको मासुयुक्त आहार रहेको खुलासा गरे । उनले पेन्सन पाउने कार्यक्रमको विज्ञप्तिमा यस्तो जानकारी आएको हो ।
अबाद अहिले वृद्धवृद्धाका लागि बनेको आश्रममा बस्छन् । यो महिना उनको जन्मदिनमा उनको लागि विशेष समारोहको आयोजना गरिएको थियो, जसमा उनी जस्तै देखिने जन्मदिनको केक पनि राखिएको थियो ।
