काठमाडौं । नेपाली कांग्रेसका सभापति शेरबहादुर देउवाले संसदुमा रहेको पूर्व र वर्तमान पदाधिकारीको बैठक बोलाएका छन् । देउवाले आफ्नै निवास बुढानिलकण्ठमा आज बिहान ८ बजेका लागि बैठक बोलाएका हुन् ।
नेपाली कांग्रेसले चैत २ गतेदेखि नै उपप्रधान तथा गृहमन्त्री रवि लामिछानेमाथि सहकारी ठगी प्रकरणमा छानबिन गर्नुपर्ने माग गर्दै संसद्मा अवरोध गर्दै आएको छ ।
बैठकमा कांग्रेस सांसदहरुले गृहमन्त्री लामिछानेमाथि छानबिन गर्न संसदीय समिति गठन गर्नुपर्ने भनेका छन् । तर सत्तारुढ दलहरुले मानेका छैनन् । यही विषयले संसद् बैठक नै प्रभावित हुने जोखिम छ ।
अघिल्लो बैठकमा त महामन्त्री विश्वप्रकाश शर्माले अर्को बैठकसम्म छानबिन समिति गठन नभए बैठक नै चल्न नदिने चेतावनी दिएका थिए । प्रतिनिधिसभा बैठक भोलि बस्दै छ । त्यही विषयमा देउवाले आज पार्टीभित्र छलफल गर्न लागेका हुन् ।
संसद्मा अवरोध गर्ने भनेर कांग्रेसले अहिलेसम्म निर्णय भने गरिसकेको छैन । पार्टीको संस्थागत निर्णय नभएको भन्दै केही सांसदहरुले असन्तुष्टिसमेत जनाइसकेका छन् ।
संसदमा कांग्रेसले खेल्ने भूमिकाबारे छलफल गर्न नेपाली कांग्रेस संसदीय दलका नेता देउवाले बैठक बोलाएको उनको सचिवालयले जनाएको छ ।
