काठमाडौं । पेट्रोलियम अन्वेषणसम्बन्धी उपकरण बोकेको ट्रक कर्णाली राजमार्गको दैलेखमा पर्ने पालीमा दुर्घटना भएको छ । नेपालगञ्जबाट सुर्खेत हुँदै कर्णाली राजमार्ग भएर भैरवी गाउँपालिकाको जलजले आयोजनास्थलमा सामान लैजादै गरेको ट्रक दुर्घटनामा परेको हो ।
साँघुरो सडकमा ठूला मालवाहक सवारी लैजाँदा दुर्घटना भएको प्रहरीको भनाइ छ । आयोजनाले पनि ठूला उपकरण बोकेका ट्रक दैलेख पुग्न कठिन भएको जनाएको छ । कर्णाली राजमार्गको मोड साना भएकाले ठूला ट्रक पार गराउन समस्या छ ।
चीन सरकारको अनुदानमा सञ्चालित पेट्रोलियम अन्वेषण परियोजनाका लागि पहिलो चरणमा २२ वटा मालवाहक ट्रक भित्रिइसकेका छन्, १ सय २८ वटा ट्रक पुग्ने क्रममा छन् । तर सडक साघुरो हुँदा ती ट्रक अन्वेषणस्थल भैरवी गाउँपालिका–१ जलजले पुग्न समस्या भएको छ ।
२०७२ साल चैतमा नेपाल र चीनबीच पेट्रोलियम पर्दाथ अन्वेषण तथा उत्खननमा सहकार्य गर्ने सहमति भएको थियो । योसँगै २०७५ साल माघमा चीन र नेपालबीच परियोजना स्वीकृत गरिएको थियो । उपकरण आयोजना स्थल पुगेसँगै जमिनबाट ४ हजार ५ सय मिटरसम्म गहिराइमा पुगेर अन्वेषण गरिने भएको छ ।
ड्रिलिङको काम सकिएलगत्तै पेट्रोलियम खानीको अवस्था र उत्खनन् टुंगो लाग्नेछ । दैलेखका नाभिस्थान, श्रीस्थान, पादुकाका क्षेत्रलाई आधार मानेर ४ सय वर्गकिलोमिटर क्षेत्रफल समेट्ने गरी सर्वेक्षण गरिएको छ ।
