काठमाडौं । प्रमुख प्रतिपक्षी दल नेपाली कांग्रेसले आज इलाम र बझाङमा वैशाख १५ गते हुने उपनिर्वाचनका लागि उम्मेदवार टुंगो लगाउँदै छ । त्यसका लागि पार्टी सभापति शेरबहादुर देउवाले आफ्नै निवास बुढानिलकण्ठमा बिहान ९ बजे कार्यसम्पादन समितिको बैठक बोलाएका छन् ।
उपनिर्वाचनको उम्मेदवार टुंगो लगाउन सभापति देउवाले तीन दिनयता नियमित छलफल गरिरहेका छन् । यसअघि हिजो दिउँसो ३ बजेदेखि साँझ ६ बजेसम्म छलफल हुँदा पनि उम्मेदवारको टुंगो लाग्न सकेको थिएन ।
इलाम-२ र बझाङ प्रदेशसभा-१ (क) मा हुने उपनिर्वाचनका उम्मेदवार बन्न कांग्रेसमा रस्साकस्सी छ । इलाम— २ को टिकटका लागि जिल्ला सभापति डम्बर खड्का र महाधिवेशन प्रतिनिधि भेषराज आचार्यबीच मुख्य प्रतिस्पर्धा छ । सभापति देउवाले खड्काको नाम प्रस्ताव गरेका छन् भने विकल्पमा नेता शेखर कोइरालाले आचार्यको नाम अगाडि सारेका छन् ।
उता बझाङको उम्मेदवारमा पनि जगत जोशी र अभिषेक सिंहबीच प्रतिस्पर्धा छ । देउवाले सिंह र कोइरालाले जोशीको नाममा अडान लिइरहेका छन् । पार्टी केन्द्र र उम्मेदवारका आकांक्षीबीच एकता गराएर आजै उम्मेदवार टुंगो लगाउने तयारी कांग्रेसको छ ।
