एजेन्सी । इन्डियन प्रिमियर लिग (आईपीएल) अन्तर्गत आज सोमबार मुम्बई इन्डियन्स (एमआई) र राजस्थान रोयल्स (आरआर) ले प्रतिस्पर्धा गर्दैछन् । यी दुईबीचको खेल साँझ ७ः४५ बजेदेखि मुम्बईको वानखेडे क्रिकेट स्टेडियममा हुनेछ ।
पाँच पटकको विजेता मुम्बई आफ्नो सुरुवाती दुवै खेल हारेर अंक तालिकाको पुछारमा छ । अर्कोतर्फ सञ्जु सामसनको कप्तानीमा रहेको राजस्थानको टोली सुरुवाती दुवै खेल जितेर तेस्रो स्थानमा छ ।
हेड टु हेडको कुरा गर्दा आईपीएलमा यी दुई टोलीबीच २८ खेल भएका छन् । मुम्बईले १५ र राजस्थानले १२ खेलमा जित निकालेको छ । एक खेल अनिर्णित रह्यो । दुई टोलीबीचको अन्तिम खेल गत वर्ष मुम्बईमा भएको थियो । जसमा मुम्बई ६ विकेटले विजयी भएको थियो ।
दुई टोलीबीच वानखेडे रंगशालामा भएको ८ खेलमा मुम्बईले ५ र राजस्थानले ३ खेल जितेको छ । पहिलो दुई खेलमा हार बेहोरेको मुम्बई इन्डियन्सको ब्याटिङ र बलिङ दुवै असफल भइरहेको छ । यो सिजन टिमका लागि तिलक वर्माले सर्वाधिक रन बनाए । उनले २ खेलमा ८९ रन बनाएका छन् । बलिङमा जसप्रित बुमराहले टिममा सर्वाधिक (३ विकेट) लिएका छन् ।
अर्कोतर्फ सुरुका दुई खेलमा राजस्थान रोयल्सका लागि टीम सन्तुलित रह्यो । ब्याट्सम्यानदेखि बलरसम्म सबैजना फर्ममा देखिन्छन् । यो सिजनमा आरआरका युवा शीर्ष क्रमका ब्याट्सम्यान रियान परागले टिमका लागि सर्वाधिक १२७ रन बनाएका थिए । जबकि स्पिनर युजभेन्द्र चहलले सर्वाधिक (३ विकेट) लिएका छन् ।
वानखेडेको पिच सामान्यतया ब्याट्सम्यानका लागि बढी सहयोगी साबित भइरहेको छ । उच्च स्कोरिङ खेलहरू यहाँ देखिएका छन् । विशेष गरी नयाँ बलमा बलिङ गर्दा यहाँका बलरहरूले राम्रो स्विङ र बाउन्स पाउँछन् । हालसम्म यहाँ १०९ आईपीएल खेलहरू खेलिएका छन् । पहिले ब्याटिङ गरेको टोलीले ५० खेलमा र लक्ष्य पछ्याएको टोलीले ५९ खेलमा जित निकालेको छ ।
सोमबार मुम्बईमा मौसम राम्रो रहनेछ । पानी पर्ने कुनै सम्भावना छैन । तापक्रम २४ देखि ३४ डिग्री सेल्सियसको बीचमा रहने बताइएको छ ।
