काठमाडौं । साताको पहिलो दिन आइतबार नेप्से परिसूचक ४८.७४ अंकले वृद्धि भएर २ हजार ५२४ विन्दुमा पुगेको छ । यस दिन नेप्सेमा रू.१० अर्ब ४४ करोड १९ लाख ५१ हजार ३०४ बराबरको शेयर खरीदविक्री भएपछि किर्तीमानी उचाई कायम गरेको हो ।
आइतबारको कारोबार दिनमा २०२ ओटा कम्पनीको १ करोड ७७ लाख ३६ हजार ७३४ कित्ता शेयर ८७ हजार ६७० पटकमा शेयर खरीदविक्री भएको छ । कारोबारमा आएका १२ वटा समूहमध्ये सबैभन्दा बढी लघुवित्त समूहको परिसूचक ७.७६ प्रतिशतले वृद्धि भएको हो । लघुवित्त कम्पनीहरुको शेयर मूल्यमा वृद्धि भएसँगै नेप्से परिसूचक पनि बढेको हो ।
बैकिङ समूहको परिसूचक ०.२२ प्रतिशत, विकास बैंक समूहको परिसूचक ०.०१ प्रतिशत र म्युचुअल फण्डको परिसूचक ०.३१ प्रतिशतले घटेको छ भने बाँकी समूहको परिसूचक बढेको छ । नेपाल फाइनान्स कम्पनीको शेयर मूल्य सबैभन्दा बढी अर्थात् ६.२७ प्रतिशत घटेको छ । उक्त कम्पनीको शेयर मूल्य आइतबार घटेर प्रतिकित्ता रू.२९९ कायम भएको छ ।
आइतबार लघुवित्त कम्पनीहरुको शेयर मूल्य वृद्धि भएको छ । आठवटा कम्पनीहरुको १० प्रतिशतका दरले वृद्धि भएको छ । गणपति लघुवित्त वित्तीय संस्था, डिप्रोक्स लघुवित्त वित्तीय संस्था, सारथि नेपाल लघुवित्त वित्तीय संस्था, आरएसडिसी लघुवित्त वित्तीय संस्था, मेरो माइक्रोफाइनान्स लघुवित्त वित्तीय संस्था,निर्धन लघुवित्त वित्तीय संस्था, नागरिक लगानी कोष र मञ्जुश्री फाइनान्स कम्पनीको शेयर मूल्यमा १० प्रतिशतका दरले वृद्धि भएको छ ।
त्यसैगरी सर्वाधिक कारोबार भने हिमालयन डिष्टीलरी लिमिटेडको भएको छ । उक्त कम्पनीको रू. ५३ करोड १७ लाख ४९ हजार बराबरको शेयर खरीदविक्री भएको छ । उक्त कम्पनीले चालू आवको दोस्रो त्रैमासिक वित्तीय विवरण आइतबार सार्वजनिक गरेको छ ।
