काठमाडौं । संवैधानिक परिषद्को बैठक आज बस्दै छ । संवैधानिक निकायमा पदाधिकारी नियुक्तिका लागि सिफारिस गर्न बैठक बस्न लागेको हो । अहिले संवैधानिक निकाय तथा आयोगमा गरी ७ जना पदाधिकारी रिक्त छन् ।
प्रधानमन्त्री निवास बालुवाटारमा ९ बजे बस्ने बैठकमा रिक्त स्थानमा पदाधिकारी नियुक्तिको सिफारिस गर्ने तयारी गरिएको छ । यसअघि आइतबार नै बैठक बोलाइ पनि सभामुख देवराज घिमिरे स्वीजरल्यान्ड भ्रमणमा गएकाले बैठक एक साता धकेलिएको हो ।
आजको बैठकले राष्ट्रिय प्राकृतिक स्रोत तथा वित्त आयोग, महालेखा परीक्षकको कार्यालय र निर्वाचन आयोगमा रिक्त पदाधिकारी नियुक्तिका लागि सिफारिस गर्ने कार्यसूची छ । एमालेसहितको गठबन्धन बनेपछि पहिलो पटक परिषद्को बैठक बस्न लागेको हो ।
संवैधानिक परिषद्को बैठकका एजेन्डाका विषयमा हिजो साँझ प्रमुख तीन दलका शीर्ष नेताबीच छलफल भएको थियो ।
प्रधानमन्त्री पुष्पकमल दाहालले नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवालाई बालुवाटारमै बोलाएर छलफल गरेका थिए ।
प्रधानमन्त्री अध्यक्ष रहने परिषदका सदस्यमा प्रधानन्यायाधीश, प्रतिनिधि सभाका सभामुख, राष्ट्रियसभाका अध्यक्ष, प्रतिनिधि सभाका विपक्षी दलका नेता र प्रतिनिधि सभाको उपसभामुख रहन्छन् ।
राष्ट्रियसभा अध्यक्ष नारायण दाहाल पहिलो पल्ट संवैधानिक परिषद् बैठकमा सहभागी हुँदैछन् ।
