एजेन्सी । रोयल च्यालेन्जर्स बैंगलोरका स्टार ब्याट्सम्यान विराट कोहली र कोलकाता नाइट राइडर्सका प्रशिक्षक गौतम गम्भीरबीचको पछिल्लो सिजनको विवाद सकिएको देखिन्छ ।
एम चिन्नास्वामी स्टेडियममा आरसीबी र केकेआर बीचको खेलमा उनीहरूले एकअर्कासँग हात मिलाएका थिए । पहिलो इनिङ्सको रणनीतिक टाइमआउटमा गम्भीर र कोहलीले न्यानो अंगालो समेत मारे ।
आईपीएल २०२३ मा लखनउ विरुद्ध बैंगलोरको लिग चरणको खेलमा मैदानमै कोहली र गम्भीरबीच झडप भएको थियो । कोहली र गंभीरबीच क्रिकेट मैदानमा भिडन्त भएको २०२३ को घटना पहिलो पटक थिएन । २०१३ मा, जब गंभीर कोलकाताको कप्तान थिए र कोहली बैंगलोरको नेतृत्व गर्दै थिए, दुबैबीच चर्को बहस भयो ।
रणनीतिक टाइमआउटमा दुवैले हात मिलाए
टस हारेर पहिले ब्याटिङ गर्न आएको आरसीबीले १८२ रन जोडेको थियो । आरसीबीको इनिङ्समा गम्भीर र कोहलीले हात मिलाएर एकअर्कालाई अँगालो हालेका थिए । यसको भिडियो सामाजिक सञ्जालमा भाइरल भइरहेको छ । फ्यानले धेरै रमाइलो कमेन्ट पनि गरेका छन् । योसँगै कोहलीले आफ्नो ५२औँ आईपीएल अर्धशतक पनि बनाए । उनी ८३ रन बनाएर अविजित रहे ।
केकेआरले आरसीबीलाई ७ विकेटले पराजित गर्यो । कोलकाताको यो लगातार दोस्रो जित हो भने बैंगलोरले दोस्रो खेलमा हार बेहोरेको छ ।कोलकाताले १६.५ ओभरमा ३ विकेट गुमाएर १८३ रनको लक्ष्य पुरा गरेको थियो ।
