एजेन्सी । सन् २०२४ को पहिलो सूर्यग्रहण अप्रिल ८ मा लाग्दैछ । यो पूर्ण सूर्यग्रहण अमेरिकाका ठूला क्षेत्रमा देखिनेछ । अब वैज्ञानिकहरुले यसको बारेमा अनौठो चेतावनी दिएका छन् । ग्रहणका कारण सडक दुर्घटना बढ्ने उनीहरुको भनाइ छ ।
सन् २०१७ मा पनि पूर्ण सूर्यग्रहण भएको थियो, जसलाई सन् २०१७ को ग्रेट अमेरिकन ग्रहण भनिन्छ । त्यतिबेला छोटो समयका लागि भए पनि सडक दुर्घटना बढेको थियो । वैज्ञानिकहरूले यसको अध्ययन गरेका छन्, जसलाई जामा इन्टरनल मेडिसिनमा प्रकाशित गरिएको छ ।
यस अध्ययनका सह–लेखक र टोरन्टो विश्वविद्यालयका मेडिसिनका प्राध्यापक डा. डोनाल्ड रिडेलमेयर भन्छन् कि पूर्ण सूर्यग्रहणको एक घण्टामा दिनको उज्यालोमा अचानक कमी र त्यसपछि अचानक अँध्यारो हुन्छ । यसको अघि र पछिको घण्टामा दुर्घटना हुने गरेको छ ।
डा. रिडेलमेयरले भने कि सामान्यतया सूर्यग्रहण लगत्तै केही घण्टामा दुर्घटनाका घटना बढी हुन्छन् । २०१७ मा, सूर्यको पूर्णताको पथ (पृथ्वीको भाग जहाँ अन्धकार छ) ११३ किमी चौडा थियो । यस बाटोको बीचमा बसोबास गर्ने मानिसहरूले लामो समयसम्म अन्धकारको सामना गर्नुपरेको थियो । अमेरिकामा करिब २ करोड मानिसले पथ अफ टोटालिटी हेरे ।
अप्रिल ८, २०२४ मा साढे दुई देखि साढे चार मिनेटको लागि पथ अफ टोटालिटी देख्न सकिन्छ । यो यसको स्थान मा निर्भर गर्दछ । यस सिमाबाहिरका मानिसहरूले पूर्ण सूर्यग्रहण देख्न पाउने छैनन् ।
ग्रहण लागेपछि किन बढ्छ दुर्घटना ?
डा. रिडेलमेयर र उनका सहकर्मी डा. जोन स्टेपल्सले सन् २०१७ को सूर्यग्रहण अघि र पछि भएका दुर्घटनाहरूको अध्ययन गरेका छन् । उनीहरूले सूर्यग्रहणको तीन दिन अघि र तीन दिनपछिको तथ्याङ्क जाँचे । दुर्घटना ३१ प्रतिशतले बढेको पाइएको छ । प्रकाशमा अचानक परिवर्तनले पनि दुर्घटना निम्त्याउँछ ।
सन् २०१७ मा सूर्यग्रहणपछि हरेक घण्टा १० दशमलव ३ जना खतरनाक सडक दुर्घटनामा परेका थिए भने सूर्यग्रहणअघि प्रत्येक घण्टा ७ दशमलव ९ जना दुर्घटनामा परेका थिए । यसको अर्थ सूर्यग्रहणपछि हरेक २५ मिनेटमा एउटा सडक दुर्घटना हुने गरेको छ ।
दुर्घटनाको प्रमुख घटना मध्ये एक हो ग्रहण हेर्न विभिन्न ठाउँमा मानिसको भीड । जसका कारण कतिपय ठाउँमा ट्राफिक जाम समेत भएको छ । यस पटक सुरक्षित स्थानमा उभिएर सूर्यग्रहण हेर्न सर्वसाधारणलाई अपिल गरिएको छ । साथै, कार नचलाउन, सिग्नलहरूमा ध्यान दिन र सिट बेल्ट लगाउन अनुरोध गरिएको छ ।
