काठमाडौँ । आइपिएल–२०२४ को छैटौं खेलमा रोयल च्यालेन्जर्स बैंग्लोरले पञ्जाब किंग्सलाई ४ विकेटले पराजित गरेको छ ।
एम चिन्नास्वामी रंगशालामा सोमबार भएको खेलमा पहिले ब्याटिङ गरेको पञ्जाबले २० ओभरमा ६ विकेट गुमाएर १७६ रन बनाएको थियो । जवाफमा बैंगलोरले ४ बल बाँकी रहँदै ६ विकेटमा १७७ रनको लक्ष्य पुरा गरेको थियो ।
खेलका क्रममा एक युवा फ्यानले सुरक्षा घेरालाई चकित पारेर विराट कोहलीलाई भेट्न मैदानमा आएका थिए । रोयल च्यालेन्जर्स बैंगलोरले दोस्रो इनिङ्समा रन पछ्याउन सुरु गर्दा विराट कोहलीले स्ट्राइक गरिरहेका थिए ।
यसै क्रममा कोहलीलाई एक फ्यान पिचमा आएर उनको खुट्टा छोएपछि अँगालो हालेका थिए । तर, त्यही क्रममा सुरक्षाकर्मीले फ्यानतर्फ दौडेर उनलाई तुरुन्तै मैदानबाट बाहिर निकाले ।
यस्तो भएको पहिलो पटक भने होइन । यसअघि पनि फ्यानहरु मैदान छिरेर कोहलीलाई भेट्ने गरेका घटनाहरु छन् ।
