काठमाडौँ । सत्तामा रहेका दलहरु जेठ महिना भित्रमा स्थानीय तहको निर्वाचन गर्न सहमत भएका छन् । अघि साँझ प्रधानमन्त्री निवास बालुवाटारमा बसेको सत्तारुढ गठबन्धनका शीर्ष नेताहरुको बैठकमा उनीहरु जेठभित्र स्थानीय तहको निर्वाचन गर्न सहमत भएका हुन् । उनीहरुले सरकारलाई सुझाव दिने निर्णय गरेको बैठकमा सहभागी सञ्चार तथा सूचनाप्रविधि मन्त्री ज्ञानेन्द्रबहादुर कार्कीले जानकारी दिए ।
गठबन्धनले आज सो निर्णय गरेपछि अब सरकारले निर्वाचन आयोगसँगको परामर्शमा स्थानीय तहको निर्वाचनको मिति तोक्न सक्नेछ । यसअघि सरकारले निर्वाचन सार्ने भनेपछि त्यसको सर्वत्र विरोध भएको थियो । विपक्षी दल एमालेले सरकारले निर्वाचन सारे आन्दोलन गर्ने बताएको थियो ।
यसअघि सरकारले स्थानीय तह निर्वाचन ऐन संशोधन गरी स्थानीय तहको निर्वाचन धकेल्ने विषयमा छलफल चलाएको थियो । गत बिहीबार प्रधानमन्त्री शेरबहादुर देउवासँगको भेटमा राष्ट्रपति विद्यादेवी भण्डारीले पनि स्थानीय चुनाव नसार्न सुझाव दिनुभएको थियो ।
