ललितपुरः सैंबु ब्याडमिन्टन सर्कलद्वारा आयोजित खुल्ला ब्याडमिन्टन प्रतियोगिता २०७७ को उपाधि डा गोपी अर्याल र शिशिर राईको जोडीले जितेको छ ।
ललितपुरको सैंबु मगरगाउँमा आयोजित यस प्रतियोगितामा पुरुषोत्तम थापा र मन कुमार थापाको जोडीले दोस्रो स्थान प्राप्त गर्न सफल भए । प्रतियोगितामा उत्कृष्ट खेलाडीको पुरस्कार भुवन रायमाझीले प्राप्त गरेका थिए भने अनुशासित खेलाडीको पुरस्कार शिशिर राईले पाएका थिए ।
विजयी खेलाडीहरुलाई स्थानीय समाजसेवी कुमार मोहन बहादुर शाहीले कप र प्रमाणपत्र वितरण गर्नु भएको थियो ।
त्यस अवसरमा समाजसेवीहरु माधव खड्का र प्रकाश बहादुर शाहीले मगरगाउँमा तत्कालै ब्याडमिन्टन खेलका लागि उपयुक्त कभर्डहल बनाउन जरुरी देखिएको बताउनु भएको थियो ।
त्यस्तै उद्योगी एवं सुपर भेटरान खेलाडी ध्रुव कुमार श्रेष्ठले खेल भनेको व्यक्तिगत स्वास्थ्यका साथै राज्यका लागि पनि जरुरी हो भन्दै सुविधासम्पन्न कभर्डहल बनाएर बालबालिकालाई पनि विस्तारै सहभागी गराउँदै लैजानुपर्ने आवश्यकता औंल्याउनु भयो ।
ललितपुर महानगरपालिका वडा नं. १८ तथा स्थानीय समाजसेवी र संस्थाको आर्थिक सहयोगमा प्रतियोगिता आयोजना गरिएको जानकारी दिँदै आयोजक समितिका संयोजक शंकर थापा मगरले यस खेललाई अझ व्यवस्थित र नियमित रुपमा संचालन गर्न वर्षैभरि खेल्न मिल्नेगरी कभर्डहल बनाउन प्रयास भइरहेको बताउनुभयो ।
उहाँले व्यवस्थित खेल संरचनाको अभावमा खुला चौरमै प्रतियोगिता गर्न बाध्य हुनु परेको पनि गुनासो गर्नुभयो ।
