काठमाडौं । उपप्रधान तथा गृहमन्त्री रवि लामिछानेले सुनको अवैध पैठारी (तस्करी) नियन्त्रण सम्बन्धी जाँचबुझ आयोगको प्रतिवेदन आजैदेखि कार्यान्वयनको तयार थालेका छन् । आयोगले सुन तस्करीमा संलग्नलाई जोगाउने गरी फितलो अनुसन्धान गरिएको ठहर गरेको छ ।
आयोगले गृहमन्त्री लामिछानेलाई हिजो प्रतिवेदन बुझाएको थियो । लगत्तै उनले लामो समय लगाएर प्रतिवेदन अध्ययन गरेका थिए । प्रतिवेदनले सुन तस्करीमा संलग्न मुख्य अभियुक्तहरुलाई नै बचाउने गरी अनुसन्धान गरिएको देखाएको छ ।
गृहमन्त्री लामिछानेले सुन तस्करी प्रकरणमा बचाउन खोजिएका व्यक्ति र बचाउन खोज्ने दुवैविरुद्ध एक्सन लिने तयारी गरेका छन् । त्यसका लागि उनले अहिले प्रधानमन्त्री पुष्पकमल दाहालसँग भेट गर्दै छन् ।
उनले आजै गृहसचिव र प्रहरी प्रमुखसहितको बैठक बोलाएका छन् । यो बैठकलगत्तै उनले कारबाही गर्ने बताइएको छ ।
