काठमाडौं । उच्चस्तरीय आयोगले बुझाएको सुन तस्करी प्रतिवेदनको अध्ययनपछि उपप्रधान एवं गृहमन्त्री रवि लामिछानेले प्रधानमन्त्री पुष्पकमल दाहाल ‘प्रचण्ड’सँग भेट गरेका छन् ।
गृहमन्त्री लामिछानेले प्रतिवेदन अध्ययन गरेर प्रधानमन्त्री प्रचण्डसँग भेट गरेका हुन् । प्रचण्डसँग भेटेर फर्किएका लामिछानेले प्रहरी महानिरीक्षक वसन्त कुँवरसँग पनि छलफल गरेका छन् ।
सुन तस्करीबारे जाँचबुझ गर्न गठित आयोगले बिहीबार बिहान गृहमन्त्री लामिछानेलाई प्रतिवेदन बुझाएको थियो । त्रिभुवन अन्तर्राष्ट्रिय विमानस्थलबाट अवैधरुपमा सुन तस्करी भएको विषयको छानबिन गर्न सरकारले असोज १४ गते उच्च अदालतका पूर्वन्यायाधीश डिल्लीराम आचार्यको संयोजकत्वमा चार सदस्यीय आयोग गठन गरेको थियो ।
आयोगले प्रतिवेदन ४८५ पृष्ठ, १३ अनुच्छेद र ९ अनुसूचीमा बुझाएको थियो । ९ भन्सार नाकाको स्थलगत अनुगमन, ६८ व्यक्तिसँगको बयान र ६१ विज्ञसँगको परामर्शका आधारमा प्रतिवेदन तयार पारिएको जनाईएको छ । प्रतिवेदनको १३औं परिच्छेदमा निश्कर्ष र सुझाव मा मुद्दा चलाउन सिफारिस, विभागीय कारबाही, सीडीआर डीएफएलमा नियमित देखिएका व्यक्तिको सूची र निर्दोष देखिएका व्यक्तिको नामावली समावेश गरिएको छ ।
प्रतिवेदन बुझे लगत्तै मन्त्रालयमै अध्ययन गरेर लामिछानेले प्रधानमन्त्री प्रचण्डलाई भेटेर यसबारे ब्रिफिङ गरेका हुन् । यसपछि उनले प्रहरी महानिरीक्षक कुँवरलाई छलफलका लागि बोलाएका थिए ।
