काठमाडौं । राष्ट्रिय सभाको अध्यक्षका लागि आज प्रस्तावको सूचना दिने कार्यक्रम छ । संसद् सचिवालयले सार्वजनिक गरेको कार्यतालिकाअनुसार आज उम्मेदवार प्रस्तावको सूचना दिनुपर्ने छ । निर्वाचन भने भोलि हुने छ ।
संसद् भवन नयाँ बानेश्वरमा आज बिहान ११ देखि दिउँसो १ बजेसम्म प्रस्तावको सूचना दिने कार्यक्रम तय गरिएको संघीय संसद् सचिवालयले जनाएको छ । साढे १ बजे दर्ता भएका प्रस्तावको सूचना प्रकाशित गर्ने र भोलि दर्ता भएका प्रस्तावमा एक भन्दा बढी उम्मेदवार भएमा निर्णयार्थ प्रस्तुत गरिनेछ । त्यसका लागि राष्ट्रिय सभाको बैठक बिहान ११ बजेर ९ मिनेटमा तय भएको छ ।
राष्ट्रिय सभा अध्यक्षका लागि नेपाली कांग्रेस र नेकपा माओवादी केन्द्रबीच प्रतिस्पर्धा छ । नेकपा माओवादी केन्द्रले अध्यक्ष पुष्पकमल दाहालका भाई नारायण दाहाललाई अध्यक्षको उम्मेदवार बनाउने निर्णय गरेको छ । यता नेपाली कांग्रेसले युवराज शर्मालाई बनाउने निर्णय गरेको छ ।
