काठमाडौं । नेकपा माओवादी केन्द्रले राष्ट्रिय सभा अध्यक्ष झक्कुप्रसाद सुवेदीलाई बनाउने तयारी गरेको छ ।
माओवादी केन्द्रको आज बस्ने बैठकले सुवेदीलाई अध्यक्षको उम्मेदवार बनाउने निर्णय गर्ने एक नेताले बताए । माओवादीमा राष्ट्रिय सभाकी उपाध्यक्ष उर्मिला अर्याल र नारायणप्रसाद दाहाल पनि अध्यक्षका आकांक्षी हुन् ।
तर अर्यालको दुई वर्ष र दाहालको कार्यकाल चार वर्ष मात्र बाँकी रहेकाले हालै निर्वाचित सुवेदीलाई अध्यक्ष बनाउन लागिएको हो । सुवेदी गत माघमा भएको राष्ट्रिय सभा सदस्यमा निर्वाचित भएका हुन् ।
राष्ट्रिय सभाको अध्यक्षको कार्यकाल ६ वर्षको हुन्छ । अर्याल र दाहाललाई अहिले अध्यक्ष बनाए बीचमै पदावधि सकिने भएकाले अहिले नै ६ वर्षसम्म आफ्नो अध्यक्ष कायम राख्न माओवादीले सुवेदीलाई अघि बढाउन लागेको हो ।
उम्मेदवारी दर्ता भोलि गर्नुपर्छ । निर्वाचन पर्सी मंगलबार हुने छ । त्यसका लागि माओवादीले आजै बैठक बसेर उम्मेदवार चयन गर्न लागेको हो ।
नेकपा माओवादी केन्द्र राष्ट्रियसभाको ठूलो दल हो । ५९ सदस्यीय राष्ट्रियसभामा अहिले माओवादी केन्द्रको १७ सिट छ । माओवादीले सत्ता गठबन्धनबाट आफ्नो उम्मेदवारी दिने छ । यसो हुँदा माओवादीले जो उम्मेदवार उठायो उनी राष्ट्रियसभाको अध्यक्ष बन्ने छन् ।
यसैगरी नेपाली कांग्रेसले पनि आजसम्म राष्ट्रिय सभाका अध्यक्षको उम्मेदवार तय गर्ने भएको छ । यसअघि कांग्रेसले नेता कृष्णप्रसाद सिटौलालाई अध्यक्ष बनाउन चाहेको थियो । तर सत्ता गठबन्धनबाट कांग्रेस बाहिरिएपछि सिटौलाले आफू उम्मेदवार बन्न अनिच्छा देखाएका छन् । कांग्रेस राष्ट्रिय सभाका दोस्रो दल हो । १६ सदस्य रहेको कांग्रेसले आफ्ना उम्मेदवारको पक्षमा अन्य दलहरुसँग पनि छलफल गर्ने निर्णय गरेको छ ।
सिटौलाले राष्ट्रिय सभाको अध्यक्षमा अनिच्छा देखाएपछि अर्का उम्मेदवारको खोजी भइरहेको छ । नेताहरुले आनन्दप्रसाद ढुंगानालाई अध्यक्षको उम्मेदवार बनाउने तयारी गरेका छन् । सम्भवत: आजै बस्ने कांग्रेसको बैठकले उम्मेदवार टुंगो लगाउने छ ।
