काठमाडौं । प्रधानमन्त्री पुष्पकमल दाहालले प्रतिनिधिसभाको आगामी बैठकमै विश्वासको मत लिने तयारी गरेका छन् । प्रतिनिधिसभाको बैठक फागुन ३० गते शुक्रबार बस्दै छ ।
आफूलाई विश्वासको मत दिएको कुनै दलले समर्थन फिर्ता लिएमा ३० दिनभित्र विश्वासको मत लिनुपर्ने संवैधानिक प्रावधान छ । प्रधानमन्त्री दाहालले सत्ता सहयात्री दल कांग्रेसलाई हटाएपछि उसले सरकारलाई दिएको समर्थन २४ गते फिर्ता लिएको थियो ।
प्रधानमन्त्री दाहालले अहिले नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, नेकपा एकीकृत समाजवादी र जनता समाजवादीलाई गठबन्धनमा आबद्ध गरेका छन् । यी दलको सांसद संख्या जोड्दा स्पष्ट बहुमत पुग्छ । ढिला गरी विश्वासको मत लिन खोज्दा सहयात्री दलबीच खटपट हुनसक्ने भएकाले प्रधानमन्त्रीले चाँडै विश्वासको मत लिने तयार गरेका हुन् ।
सत्ता गठबन्धन दलमध्ये नेकपा एमालेका ७७, नेकपा माओवादी केन्द्रका ३२, रास्वपाका २१, जसपाका १२ र नेकपा एकीकृत समाजवादीका १० सांसद छन् । यी सबै मत जोड्दा प्रधानमन्त्रीको पक्षमा १ सय ५२ सांसद पुग्छ । विश्वासको मत पाउन १ सय ३८ सदस्य भए पनि पुग्छ । तर पाँच दलीय गठबन्धनमा फरक वैचारिक धारका पार्टी भएकाले जुनसुकै बेला जे पनि हुनसक्ने भएकाले दाहालले ३० गते नै विश्वासको मत लिने तयारी गरेका हुन् ।
विश्वासको मत चाँडै नलिए गठबन्धनमा फुट आउनसक्ने चिन्ता पनि प्रधानमन्त्री दाहालको छ । किनकी कांग्रेस सभापति शेरबहादुर देउवा अहिलेदेखि नै यो गठबन्धन टुटाउने कसरतमा छन् । उनले मधेस केन्द्रीत दलहरुसँग नयाँ समीकरणका बारेमा छलफल गरिसकेका छन् । यो अवस्थामा तत्कालै विश्वासको मत लिने चाहना प्रधानमन्त्री दाहालले राखेका हुन् ।
