धनगढी । सुदूरपश्चिम प्रदेशका मुख्यमन्त्री कमलबहादुर शाहले नागरिक उन्मुक्ति पार्टीलाई समेटेर मन्त्रिपरिषद् विस्तार गरेका छन् । मुख्यमन्त्री शाहले एक जना विनाविभागीयसहित तीन मन्त्री थपेका हुन् ।
संघीय सत्ता गठबन्धन दल नेकपा माओवादी केन्द्र र नेकपा एकीकृत समाजवादी पार्टीबाट मन्त्री भएकाहरुले राजीनामा दिएपछि अल्पमतमा परेका मुख्यमन्त्री शाहले आज नागरिक उन्मुक्ति पार्टीलाई सरकारमा सहभागी गराएर मन्त्रिपरिषद् विस्तार गरेका हुन् ।
नागरिक उन्मुक्ति पार्टी संसदीय दलका नेता घनश्याम चौधरी आर्थिक मामिला मन्त्री भएका छन् भने सांसद इन्दिरा गिरीलाई भूमि व्यवस्था, कृषि तथा सहकारी राज्यमन्त्रीको जिम्मेवारी दिइएको छ । त्यस्तै खुशीराम चौधरीलाई विनाविभागीय मन्त्रीको जिम्मेवारी दिइएको छ ।
प्रदेश प्रमुख देवराज जोशीले नवनियुक्त मन्त्रीहरुलाई आजै पद तथा गोपनीयताको शपथ गराएका छन् । स्वतन्त्र सांसद जोशी र राप्रपाकी खेमा विष्ट भने सरकारमा नजाने भएका छन् । मुख्यमन्त्री शाहले मन्त्री मण्डल विस्तार गरेको यो चौथो पटक हो ।
