एजेन्सी । बुधबार राति मुम्बईको पाली हिल क्षेत्रमा रहेको नवरोजी हिल सोसाइटीको १७ तले भवनको १४ औं तलामा आगलागी भएको थियो ।
यस भवनको १५ औं तलामा बलिउड अभिनेत्री ज्याकलिन फर्नान्डिजको फ्ल्याट छ । दमकलले डेढ घण्टाको मेहनतपछि आगो नियन्त्रणमा लिएको थियो । घटनामा कुनै मानवीय क्षति भने भएको छैन ।
समाचार अनुसार भवनको १४ औं तलामा रहेको भान्साकोठामा आगलागी भएको हो । तर, यसको वास्तविक कारण अझै थाहा हुन सकेको छैन । यो आगलागीको भिडियो सामाजिक सञ्जालमा भाइरल हुनेबित्तिकै ज्याकलिलका फ्यानहरूले चिन्ता व्यक्त गर्न थालेका थिए ।
ज्याकलिनको भव्य ५ बिएचके अपार्टमेन्ट यस भवनको १५ औं तलामा छ । उनको अपार्टमेन्टको इन्टेरियर डिजाइन शाहरुख खानकी पत्नी गौरी खानले गरेकी थिइन् । मिडिया रिपोर्टका अनुसार २५५७ स्क्वायर फिट क्षेत्रफलमा फैलिएको यस अपार्टमेन्टमा क्लब हाउस, जिम र स्विमिङ पुलको सुविधा पनि छ ।
