काठमाडौंः पूर्वराजा ज्ञानेन्द्र शाहले प्रजातन्त्र भनेको आवधिक निर्वाचन र दल विशेषका नेताहरुको शासन प्रणाली मात्र होइन, यो सामाजिक जीवन पद्धति पनि रहेको बताउनु भएको छ ।
७१औं राष्ट्रिय प्रजातन्त्र दिवसका अवसरमा शुभकामना सन्देश दिँदै पूर्वराजा ज्ञानेन्द्रले हरेक नागरिकले प्राप्त गर्ने सन्तुलित खुशीमा मात्र प्रजातन्त्रको प्राण अटूट रहने स्पष्ट गर्नु भएको छ ।
सन्देशमा उहाँले भन्नु भएको छ, “जनता र राजाको सहमतिबाट नेपाल खडा भएको र त्यसको अस्तित्व रक्षा पनि सहमतिबाट मात्रै हुने यथार्थको अवज्ञाले निषेध र विभेदको राजनीति शुरु गरिएकोमा मुलुक दिनप्रति दिन जटिलतामा फस्दै गएको महशुस आम नेपालीले गरिरहेका छन् ।”
पूर्वराजा शाहले अगाडि भन्नु भएको छ, “राष्ट्रको प्रतिष्ठा बढाउन हामी कति समर्थ भएका छौं ? सबैले मातृभूमिको पवित्र माटो छातीमा राखेर आत्म समीक्षा गर्नुपर्ने बेला आएको छ ।”
प्रजातन्त्र आधुनिक शासन पद्धतिको सर्वोत्तम विधि व्यवस्था हो, विश्वमान्य प्रजातन्त्रको सिद्धान्त अनुरुप नेपालमा प्रजातान्त्रिक विधि व्यवहार अघि बढोस् भन्ने हामी सबैको आकांक्षा हो भन्दै उहाँले अगाडि भन्नु भएको छ, “प्रजातन्त्र प्राप्तिको ७० वर्ष पछि आएर पनि हामी अहिले प्रजातन्त्रकै विषयमा विवाद, द्वन्द्व र बहसमै व्यस्त छौं, ग्रस्त छौं ।”
उहाँले प्रजातन्त्रमा जनशक्ति र जनसम्मति नै विशिष्ट पक्ष हो भन्दै जनताको आस्था, चाहना र जनभावना अन्तत अमिट रहन्छ र यसलाई मेट्न खोजेर, बटारेर त्यो मेटिदैन बटारिन्न भन्नु भएको छ ।
