जापान । जापान सरकारले विदेशी सम्बन्धी अध्यागमन नीतिमा संसोधन गर्ने तयारी गरेको छ । जापानको सरकारी संचार संस्था एनएचकेले उल्लेख गरे अनुसार देश निकाला सम्बन्धी नियमलाई केही खुकुलो बनाउन लागेको हो । देश निकालाको प्रकृयामा रहेका बिदेशीहरु परिवार वा उनिहरुलाई जिम्मा लिने ब्यक्ती भएमा उनिहरु सँगै जीवन यापन गर्न पाउने गरी कानून संसोधन गर्न लागिएको हो ।
देश छोड्न दिएको निर्देश अस्विकार गर्ने समस्याहरु कम गर्न भन्दै जापान सरकारले अध्यागमन सम्बन्धी नियमनै परिवर्तन गर्न लागेको समाचारमा उल्लेख छ । यस्तो सुबिधा त्यस्ता ब्यक्तिहरुले मात्रै पाउछन जो फरार हुन सक्ने सम्भावना न्यून छ । संसोधन गर्न लागिएको नयाँ नियम अनुसार देश निकाला गरिएका बिदेशीहरुलाई पुन जापान प्रबेशमा लगाएको प्रतिबन्ध ५ बर्ष बाट १ बर्षमा झार्न लागिएको छ ।
बिगतमा जापान बाट देश निकाला गरिसकेकाहरुलाई पुनस् देश निकाला गरेको खण्डमा १० बर्ष र पहिलो पटक देश निकाला गरिएकाहरुका हकमा ५ बर्ष जापान प्रबेशमा प्रतिबन्ध लगाइएको छ । पहिलो पटक देश निकाला गरिएकाहरुको प्रतिबन्ध ५ बर्ष बाट १ बर्षमा झार्न लागिएको भएपनि १० बर्षे प्रतिबन्ध के हुने भन्ने केही उल्लेख गरिएको छैन ।
कानून उल्लघन गरी एक बर्ष भन्दा बढी जेल सजाय भोगेका या लागु औषध कारोवारमा संलग्न भएकाहरु भने आजीवन जापान प्रबेश गर्न पाउदैनन । अध्यागमन नियम संसोधन सम्बन्धी प्रस्ताब सरकारले संसदमा पेश गर्ने तयारी गरिरहेको पनि समाचारमा उल्लेख गरिएको छ ।
