काठमाडौं । नेपाली कांग्रेस र माओवादी केन्द्रसहितका दलको सत्ता गठबन्धन भत्किएको छ । योसँगै अब प्रधानमन्त्री दाहालले आजै मन्त्रिपरिषद् पुनर्गठन गर्ने छन् ।
नेकपा माओवादी केन्द्रका अध्यक्ष पुष्पकमल दाहाल नेतृत्वको सरकारमा अब एमालेसहित रास्वपा, राप्रपा र जसपा सहभागी हुनेछन् । यसबारे ती दलका शीर्ष नेताहरुबीच सहमति भइसकेको छ । यसबाहेकका दलहरुसँग पनि प्रधानमन्त्रीले कुरा गरिरहेका छन् ।
गएरातिसम्म चलेको बैठकमा जुटेको सहमति अनुसार माओवादी केन्द्रले नेपाली कांग्रेससँगको सहकार्य तोड्ने भएको हो । यद्यपि एकपटक प्रधानमन्त्री दाहालले कांग्रेस सभापति देउवासँग आज कुरा गर्दैछन् । तर गएरातिको सहमतिबाट दाहाल पछि नफर्कने अडानमा छन् ।
पुरानै गठबन्धन फर्काउने सहमति राति जुटेछि अहिले बालकोटमा एमाले र बालुवाटारमा माओवादी केन्द्रको सचिवालय बैठक बसिरहेको छ ।
एमालेबाट आजै पदम गिरी सरकारमा जाने
कांग्रेससहितको सत्ता गठबन्धन भत्किएसँगै नेकपा एमालेबाट पदम गिरी मन्त्री बन्ने निश्चित भएको छ । ओली निवास बालकोटमा बसेको एमाले सचिवालय बैठकले गिरीलाई सरकारमा पठाउने निर्णय गरेको हो । एमालेका प्रमुख सचेतक गिरी यसअघि पनि स्वास्थ्यमन्त्री बनेका थिए ।
दाहाल नेतृत्वको सरकारमा रास्वपा र राप्रपा पनि सहभागी हुने भएका छन् ।
