काठमाडौं । नयाँ गठबन्धन बनाउने कसरतमा लागेका माओवादी केन्द्र, नेकपा एमाले, राष्ट्रिय स्वतन्त्र पार्टी र जनता समाजवादी पार्टी आकस्मिक बैठकमा छन् ।
नेकपा एमाले केन्द्रीय सचिवालयको बैठक अध्यक्ष केपी शर्मा ओलीको निवास बाल्कोटमा बसिरहेको छ । एमालेको सचिवालय बैठक २५ गते बस्ने तय भए पनि पछिल्लो राजनीतिक घटनाक्रमले आकस्मिक रुपमा सचिवालय बैठक बोलाएको हो ।
बैठकमा अध्यक्ष ओलीले प्रधानमन्त्री एवम् माओवादी केन्द्रका अध्यक्ष पुष्पकमल दाहालसँग गएराति भएको छलफलका विषयमा जानकारी गराएका छन् ।
माओवादी केन्द्रको सचिवालय बैठक बालुवाटारमा
यता सत्तारुढ नेकपा माओवादी केन्द्रको सचिवालय बैठक प्रधानमन्त्री निवास बालुवाटारमा बसिरहेको छ । गएराति एमाले अध्यक्ष केपी ओली, रास्वपा सभापति रवि लामिछाने, जसपा अध्यक्ष उपेन्द्र यादवसँग छलफल गरेका प्रधानमन्त्री पुष्पकमल दाहालले पछिल्लो राजनीतिक घटनाको विषयमा छलफल गर्न माओवादीले सचिवालय बैठक बोलाएका हुन् ।
यता जनता समाजवादी पार्टी र राष्ट्रिय स्वतन्त्र पार्टी पनि आन्तरिक बैठकमा जुटेका छन् । राजनीतिक घटनाक्रम बढ्दै गए आजै नयाँ गठबन्धन बन्ने र नेपाली कांग्रेस र नेकपा एकीकृत समाजवादी सरकारबाट बाहिरिने छन् ।
