काठमाडौं । सत्ता गठबन्धन दलको बैठक आज बस्दै छ । गठबन्धन दलका प्रमुख घटक नेपाली कांग्रेस र नेकपा माओवादी केन्द्रबीच खटपट आइरहेका बेला आज बैठक बस्न लागेको हो ।
सत्ता गठबन्धन संकटमा छ । प्रधानमन्त्री पुष्पकमल दाहालल गठबन्धन दल कांग्रेससँग निकै असन्तुष्ट छन् र वैकल्पिक गठबन्धनको कसरत थालिसकेका छन् । त्यही कारण आजको गठबन्धन बैठक निकै पेचिलो हुने आशंका छ । किनकी राति नै प्रधानमन्त्री दाहालले एमाले अध्यक्ष केपी शर्मा ओली र राष्ट्रिय स्वतन्त्र पार्टीका सभापति रवि लामिछानेसँग नयाँ समीकरणका विषयमा छलफल गरिसकेका छन् ।
प्रधानमन्त्री निवास बालुवाटारमा बस्ने बैठकमा आज प्रधानमन्त्रीले संसदमा दिने जवाफका विषयमा निर्णय हुनेछ । विपक्षी नेकपा एमालेले तीन जना मन्त्रीको राजीनामा माग गर्दै आएको छ । संसदमा उठेका विषयमा सरकारले जवाफ नदिएको भन्दै विपक्षी दलहरुले आपत्ति जनाउँदै आएका छन् । सभामुख देवराज घिमिरेले आजको बैठकमा सरकारलाई जवाफ दिन निर्देशन दिइसकेका छन् ।
गठबन्धन दलको बैठकमा विपक्षीले उठाएका मागका विषयमा संसदमा के जवाफ दिने बारे छलफल हुने छ । त्यसैगरी मन्त्रिपरिषद् हेरफेरका विषयमा पनि छलफल हुने बताइएको छ । मन्त्रिपरिषद् फेरबदलमा नेपाली कांग्रेसका सभापति शेरबहादुर देउवासमेत सकारात्मक भएपछि अब कसलाई बनाउने भन्ने बहस सुरु भएको छ । तर प्रधानमन्त्री दाहाल नयाँ राजनीतिक समीकरणतर्फ अघि बढेकाले आज यस विषयमा के हुन्छ यकिन भन्न सक्ने अवस्था छैन । वर्तमान गठबन्धन कायमै रह्यो भने चाहिँ प्रधानमन्त्रीले सबै दलसँग नयाँ मन्त्री हुनेहरुको नाम माग्ने सम्भावना छ ।
यसैगरी गठबन्धनको बैठकमा संक्रमणकालीन न्यायसम्बन्धी विधेयकका विषयमा समेत छलफल हुने छ । संक्रमणकालीन न्यायमा माओवादी केन्द्र र नेकपा एमालेबीच समान धारणा आउन थालेका बेला नेपाली कांग्रेसले दुई वटा विषयमा विमती राखेको छ । आज गठबन्धनको बैठकमा यस बारे छलफल हुने र आजै बस्ने कानुन समितिको बैठकले यसलाई टुंगो लगाएर संसद्मा पेश गर्ने तयारी छ ।
बैठकमा राष्ट्रिय सभाको अध्यक्ष कसलाई बनाउने भन्ने पनि छलफल हुने छ । राष्ट्रिय सभाको अध्यक्षमा नेपाली कांग्रेस र नेकपा माओवादी केन्द्रले दाबी गर्दै आएका छन् । यही बेला नेकपा एमाले र माओवादी केन्द्र नजिकिएका छन् । यसले कांग्रेसमा संसय देखिएको छ ।
